بــدوون مـقـــدمـــــــات
والله ماطاب لي خاطر و لا راق بال = ولا سهر في عنا ليلي نجوم .. وقمر
إلا همومي ثقيله والمدامع ثقال =واول خبر في السعاده صار آخر خبر
البارحه يوم ضاق الصدر .. والليل طال = والنوم ما مر في " بال العيون " وعبر
هبت جنوب وهبوب الريح قالت : تعـال = وحلفت معاد انام إلا وانا في " قـطــر "
قالوا : وش العلم ! قلت : العلم صوب الخوال = راعي ظفر .. ماقلطت إلا على أهل الظفر
ماهانت الدار في صدري وانا أخو العيال = إلا فـراق " الكــــويـت" أيام ..كسرت ظهر
خلك من السالفه ترى السوالف طوال = عساك من قبل لاتزعل تلاقي عذر
شفت الفناجيل قبل أشوف.. صفر الدلال = ودريت بأن "الدلال تفوح " دون النظر
وغيري نظرها وقال إلا عساه الزوال =جاب الفناجيل من قبل .. الدلال الصفر
فالله يجير اليمين من الفعول الهزال = والله يجير الفعول امن انحطاط البشر
ما كل كلمه تمر القلب عادي .. تقال = ولا كل زله تعدي عقب .. حذف الغتر
والكذبه اللي يغطيها ظلام الليال = وش يستر أصحابها لابان نور الفجر
والفقر _ ياخايفين الفقر _ قل الرجال = والضيق _ يامدعين الضيق - ضيق القبر
أهل الطوايل تطول .. وماتشوف الحثال = وأهل الفشيل تموت .. وماتطاول شبر
إن كانها بالمعنى .. ما ذخرت الجزال = وإن كانها بالمراجل .. ماذخرت العمر
شف كيف مر الزمن .. شف كيف طال المطال = وأنا أدعي الله لايحرمني امن الصبر
ما أحاتي اشلون راح أرقى متون الطوال = أحاتي لامن عثرت منين بلقا عذر ؟!
" ماهو قهر " .. ماتعرف تطول روس الجبال =من فوق روس الجبال تطيح ..هذا القهر
صـــلاح العرجـــاني 