[خالد بن جفـــن]

هبلي غفيت البارحه دوب هسهاس = مابين صحواتٍ وغفوه وحيده
وأقبلت يا ليل الحزن بس بنعساس = للعين غفوه والمشاعر عنيده
بي تختلي أليا هجع كل عسّاس = مني تبي صافي دَموعٍ جديده
لوّي دريت السالفه همّ محتاس = لصفق كَفوفَ الحاصله لا تعيده
جرحٍ سطى في داخل القلب وسواس = يا هو حقيقه حكيهم يا وكيده
أن الوفى قد ضاع في لجّة الناس = هذا بعجه غاطسٍ ما تصيده
ظنه كسب قولة نعم بالتمسّاس = ما يدري الماخوذ ما به وليده
يا ما رفينا خملته قول لا باس = نصبر على جور الخطا لو يزيده
ندمح وننسى لو غداله تضرّاس = كله عنى ناس ولو هي بعيده
يا غافين ما في النوايا تحسّاس = في ذمة اللي خالقٍ ياعبيده
ما قدره ربي علينا ولاباس = نصبر ولو صكاتها بي شديده
يوم الخيانه حلقها به تيبّاس = هو ناشفٍ لي ريقها من لهيده
كانه حسب طعن القفا به تنوماس = ظنه على ما قيل كلمه حميده
حتى ولو أقسم بحلفه بلا قياس = مستبشرن ما للخيانه عويده
حذرى يغرك من بحكيه تبرباس = ما يطهر المخزي وطيبك تزيده
وعويس أسمك صار غصبن يعوّاس = تضرب على جال السوالف هبيده
تضرب وضنّك يا ولد بك تفرّاس = من زود جيدك غادين لك نقيده
جنب عن اللي ما حسب لك ولا داس = من صوبكم طرفن ولا له تعيده
يا صبرنا لو ماشيه هي تنكّاس = دنيا غريبه كلمة الحق شهيده
لونا بغينا صيدها صيد قرناس = لي خاشرت غربانها في وريده
وأن عاندت جمره على كف محماس = تنجح لحمها ما تضرّ الحديده
والغايبه يا فكرنا من تهوجاس = تطري علينا في حلومن نشيده
نلعب لعين اللي هواها تنوماس = صفرا تتل القلب غصبن بلا قيده
لو هي حكت تشرق لها سود لدماس = وان هي طغت صارت حروفي بليده
من حر ما تسقي بي تعوماس = وجه السوالف شاينن يا فقيده
علمي تجافيتك وحظي بلفلاس = أثر التغلي ما نفع زود جيده
غبتي وغابت بي فرحتن ولوناس = كني على جمر الغضا لمس أيده
أونس لواهيب العنا تسقي الكاس = مرن شربته من فراقك زهيده
له في حنايا الجوف منك تقواس = ترهق معاليقي لدقّت وتيده
نايف بوصفه كل حرفن وقرطاس = لوّه نشد أسمه كتب في الجريده

خالد براك بن جفن
10/12/2014