صدري بعد مارحت خالي ومهجور
واسوار صدري يوم قفيت طاحت
ماكنه الا بيت له وقت معمور
دارت عليه سنين عمره وراحت
البيت طين وصاحب البيت مقبور
وكل الاماكن داخل البيت ناحت
تبكيه حجر وسقف طايح على سور
ولو للزوايا صوت بالصوت صاحت
ويبكيه مشراقه على طلعة النور
لو كان ماله عين ودموع ساحت
وتبكيه بير ودلو وعذوق وزهور
وصوت الهوى ودروب رجله تماحت
ويبكيه كل اللي وقع منه مكسور
لو انها قبل المطيح استباحت
شبهت صدري بيت خالي ومهجور
واسوار صدري يوم قفيت طاحت