السلام عليكم و رحمة الله و بركاته
اقدم لك قصيدة من جديدي و اتمنى ان تنال إعجابكم ..
في الشيخ عبدالمحسن بن عبدالرحمن الدامر
والمقصد من القصيدة : شكر و رد ثناء لمن يستحقه
أسألك يا مالك أرزاق و اجال العباد=يا عظيم الملك يا زايد العبد الشكور
زيدني من موهبة شعري بعذب المداد=بآتغنّى في خصايل تضيق بها الصدور
أرزمت في خافقي مثل رعّاد الهجاد=كنّها ديّان و تقول لي : منت معذور
كيف تنسى اللي بطيبه على شرواه زاد ؟=سور منهو من قسى الوقت ما ذرّاه سور
قلت : والله ما نسيته و كنّي في جهاد=كم و كم غنيت طاروق في وافي الشبور
كل ما قلت : الشعر ساد .. وصف الشيخ ساد=يتعب اللي من رهاوه سبح سبع البحور
احسب انّي شاعر شرس و اقدح من زناد=لين وصفه صار عندي مثل نحت الصخور
طال قافي في عنادي و طوّعته عناد=لأجل عين النادر الفذّ من بين الصقور
ذاك ( ابو خالد ) مع الناس له راس الشداد=لو يبور الوقت و الناس لا يمكن يبور
طيب و اخلاق و تواضع ولاهي به جداد=يوم غيره لا كثر ماله اعماه الغرور
من يقول النار عقب الجمر تصبح رماد=جاهل ٍ في ضرب الأمثال لو صوته جهور
و الدليل إليا بغيته مع العلم الوكاد=دوك ( عبدالمحسن الدامر ) السيف البتور
لا نصيته و انت في عينك الدنيا سواد=قدّ لك بعد الولي نور و الفزعات نور
الرجل يزرع دروبه و يقفاه الحصاد=طيب ولاّ عكس للطيب و الدنيا عبور
و الختم صلوا على المصطفى خير العباد=خير من يمشي على الأرض و اللي فالقبور
(صلى الله عليه و سلم)
و سلامتكم