أنــا لا بدالي لازمٍ حــاضيٍ مـــــلـــزوم
نصيت الرفيق اللي مسك درب شيبانه
نصيت الرفيق الوافي الصادق الجــزوم
صـديقٍ رفـــع قـبـل الثلاثـيـن عنوانـه
وهـــذي تراها ميزة النــادر الحــــــدوم
وأنا أميز النادر بعينــــه وجنحانــــــه
فروخ النوادر مــا تشابه فروخ البـــــوم
ترى الحر له خانات والبوم له خانـه
وأنا في لزومك يابن عمي نصيت القوم
ولحدٍ يعرف الغيب يا كون سبحانــه
نصيبنا من العجمان شيخٍ قوي عزوم
ويا طيب ابوه وطيب خاله وجدّانه
ويا طيب عمه راعي الموقف المحتوم
لا جا نهارٍ يعمس الرأس دخانه
ألا يا حمد ما نيب من فزعتك محروم
تراني صديقٍ راجحٍ معك ميزانه
ألا ياحمد يابو نغيمش عداك اللوم
جمايلك عندي ياحمد طيب وميانه
عيونك عن النوماس ما تهتني بالنوم
تشوف العشى والمرجله تحت حجانه
بعيدٍ قريبٍ مشكلٍ باتعٍ شغموم
كريمٍ شجاعٍ يجرح كبود عدوانه
جزوعٍ متبن ضلوع قرمٍ حفيد قروم
ربيعٍ لضيفانه وريفٍ لجيرانه
نزيه من دروب الدنس طاهرٍ محشوم
ويالله عسى الرديان من تحت حذيانه
ألا يابن قروش نور نجمك تحته نجوم
ولك مركزٍ مرموق والعز حيطانه
ولو تعتذر معذور ما يقتفيك ثلوم
عسى من يذمك يلحس الموس بلسانه
أنا أقدر أهل الجود والا الرخوم رخوم
وهجوسي على مدحك من العام عطشانه
الشاعر ، معجب بن شرعان المطيري