[مسعطر]

يا عين يا اللّـي نومهـا مـا هناهـا = لا زلّ ثلـث اللّيـل جاهـا عناهـا
قامت تهلّ الدمع من جور ما بهـا = عبايـراً تجـرح خـدودي بماهـا
عبرت رضيع ٍ فاقـد ٍ شوفـة امُّـه = ولاّ خـلـوج ٍ ذابحـيـن ٍ جنـاهـا
ولاّ يتيـم ٍ فـي ولايـة خـوالـه = روحه بيد مـن لا رحمهـا ولاهـا
ولاّ سجين ٍ صكّـو البـاب دونـه = حال السقف من دون شوفت سماها
وان قلت انا : يا عين يكفي تصبـري = يكفي ترا ما صاب نفسـي كفاهـا
لا تسِهِرين المبتلـي يـا حزينـه = خايف على العين العما من بكاهـا
ردّت علـي و حيّرتنـي و قـالـت : = من طاعتـه عينـه لمنـه نهاهـا
و راي الوم العين مـا الـوم قلبـي ..َ!!= و القلب سبّة سهرها مـع شقاهـا
و اصبحت انا متحيّر ٍ فـي عذابـي = و ما لي بشكوى الحال مما وزاهـا
و شكيت همّـي للجبـال الرواسـي = و لكن ونين القلـب كسّـر صفاهـا
و شكيت همـّي للبحـور الغزيـرة = و من ساع سمعت ونّتي نشّ ماهـا
و شكيـت همّـي للهبايـب و قفّـت = و عجزت تشيل هموم قلبـي معاهـا
و شكيت همـّي للفجـوج الوسيعـة = و لكن ونين القلب ضيـّق فضاهـا
و شكيت همـّي للنّجـوم السـواري = و لكن ونين القلـب غطـّا ضياهـا
و شكيـت همـّي للّيالـي الطويلـه = و الصبـح بـان و ونّتـي مبتداهـا
و رحت اشتكي للشمس من حُرّ مابي = و الشمس غابت من خـلاه بخلاهـا
و تساوت الاظلام و النـور عنـدي = ما عاد اميّز صبحها مـن مساهـا
ما لي جدا الا بـس دمعـه و ونّـه = و ابكي بكا اللّي حاجته مـا قضاهـا
ابكي من الحرمان و اشكي من الجفا = و جـروح روحـي ما لقينـا دواهـا
و اعظ سني في بهامي مـن النـدم = و تلعب بي الحسره على ما طراهـا
و اقنب قنيب الذيب و اعول عويلـه = لما تكامـل عبـرت ٍ جـا سواهـا
كلّه سبـب مـن لاعنـي بالمـودّه = و قفّا و اخذ روح ابن ذيـب خذاهـا
عذّبني المجمول و احـرق ظمايـري = و حطّ بحشاي جروح ٍ تنزف دماهـا
خمـس سنـوات بالدقيقـه نعدّهـا = والاّ لطيف الـروح يمكـن نساهـا
لا وا عذابي مشتقـي بـه فـؤادي = و الروح من تحت المحنـا سباهـا
خل ٍ شريت القـرب منّـه بروحـي = عرّضت له روحي و هو ما شراهـا
و انا اللّي ارخص كل غالي من اجله =وايلا طلبتـه عـازه ٍ مـا عطـاهـا
علـي شحيـح شـح زود نـداده = و زوّد على كبـد المولـّع ضماهـا
و ألهب على قلبـي بنـار المحبـه = و تسعين عرقـات ٍ بكبـدي كواهـا
و يشوف حالي ما يهوّن مصيبتـي = حسبي عليه ايش لون نفسه قواها
هذي سبايـب مـن برانـي بـودّه = ولا رحـم روح ٍ بوصلـه شفـاهـا
و ترجمت ونّاتي بمعنـي قصيدتـي = و ارجي عسى يبكي لها من قراهـا
و يقوله اللّـي حطّـم البيـن قلبـه = يا عين ياللّي نومهـا مـا هناهـا

الله الله الله ,,

هذا والله القصيد اللي يطرب المستمع و القاري ,,

صح لسان المهان على القصيدة الجزلة ,,

و صح لسانك يا الوعيلي ,,


تقبل مروري ,,
أستودعك الله ,,