[سعيّد ابوجعشه]

الشاعر / سالم بن جخير

قصيده في صاحب السمو الامير / جلوي بن عبد العزيز بن مساعد ال سعود . نائب امير المنطقة الشرقية

ياللي تحبـون الطواريـق الجـدد=اللـي تنومسنـي وتشهـر بسببـي
وان لاحت ابروق الشعر حن الرعد=تبرق وترعد كلهـا حسـب طلبـي
مدامنـي فيهـا وكـيـلا معتـمـد=ياشـرد القيفـان علـي واشربـي
والشاعر اللي مـا يبشـر بالسعـد=ماهوب من ناسي ولا ضمن اعربي
والشاعر اللي لا شكـر ولا حمـد=في مقرن الحجان يكتب لـه غبـي
وانا احمد الله يوم انا شاعـر بلـد=وفي كل دار اجيه مانيـب اجنبـي
مادام مـن جيتـه لقيفانـي شهـد=فالحمـد لله يـوم ماخـاب تعبـي
ترى البحر لاهاج يطلع لـه زبـد=ياكيف انا لاجيـت للحـر الأبـي
باشوش وابطش واتعزوا واستعـد=ويبين في عيوني شموخي ونسبـي
مادام راسي حي ماخـون العهـد=واجب وانا مانيب اخلـي واجبـي
يامرحبا بك ياجلـوي قبـل وبعـد=ترحيبتـن فيهـا شمـوخ اليعربـي
والمدح لك ولديرتـي دار السعـد=قبل امدح اهل دبي والا بـو ظبـي
من مبتداء عمري الى وقت اللحـد=والمملكة من عارضي حتى شنبـي
ياسيـدي حنـا ليـا حـان الوعـد=ناتيك لـو ناتيـك نرثـع ونحبـي
ياتيـك شايبنـا وياتـيـك الـولـد=واكبر دليل انا واخي فهـد وابـي
لك الـولاء منـي ومنهـم للابـد=مثـل ولاء اليثـربـي لليثـربـي
ياسيدي وانت الذرى وانت السنـد=الى اعتزن اهل الغطاوي والعبـي
مادام ابيك اللي على العليـا صعـد=وش عاد تبغي غير هذي وش تبـي
انا اشهد ان الشبل من ذاك الاسـد=اقولهـا مـن مشرقـي لامغربـي
انت كرمك ياتي مثـل زخ البـرد=كنك تقول لمزنـة الغيـم اسكبـي
منهو يحبك عاش في امـن ورغـد=ومن يكرهك من وقفتك يسبا سبـي
نظرتك مثل الحر في وقت الهـدد=وهيبتـك تربكنـي وتثـر فركبـي
لكـن راسـي لاخضـع ولاسجـد=وكانه سجد ماهوب راسي ويهبـي
يقولها اللي لابغـا الشـي اجتهـد=اليـن ياصـل مايشـاء ومأيـبـي
هـذا وباقـي شـي ماقلتـه بعـد=يا فكـرة الابـداع طبـي والعبـي
والله يالولا الواحد الفـرد الصمـد=وخوفي على ديني وسيرة مذهبـي
اني لاحلق لين اجـي قمـة احـد=واني لاقول انك نبـي وابـن نبـي