[العـــسر]

السلام عليكم ورحمة الله وبركاته
أقدم لكم هذه الرائعه ..,,
واتمنى ان تحوز على رضاكم ..,,

يامكثرين الهرج لااسمـع ولااجيـب=تريحوا من فضلكـم واسمحـوا لـي
تريحـوا لاتلحـقـون المشاهـيـب=على الردى مانـي شفـوق عجولـي
بالعقل والصبر ادب النفـس تاديـب =والا لهـا مـده تصـول وتجـولـي
خلج ترازم فـي سيـاج المحاديـب=مافيهـن اللـي بالعقـال معقـولـي
اشد وطية زور مـن شمـخ النيـب =اليا ضاع مفعول الحيـل والحلولـي
انـا لاقلـت ارتـب القـول ترتيـب=حتى يجي كـي علـى فـك قولـي
اليا ارسلت لافكار القريحـه مناديـب=ترايعن مـن عقـب ماهـن جفولـي
لكن مالـي مـن وراهـا مكاسيـب=لو كان عشاق القشـر صفقـوا لـي
مامستفيـد الا العـدو والاجانـيـب =ولانـي مطيـع مقرقعيـن الطبولـي
خليتهـا تعطـي فجـوج مجاديـب =جربا تجـود فـي رسنهـا مهبولـي
والله لااجنب دام لـي درب تجنيـب =من شرهة حشـام الرفاقـه خجولـي
لـو انهـا بيـن النحـر والتلابيـب =من الحيا وجهـي مهـوب مغسولـي
طبـع لنـا نشـب عليـه ونشيـب =وطبيـعـةٍ لعـلـهـا مـاتـزولـي
على الجماعـه للجماعـه مواجيـب =الا جهلـوا قـدر الرفيـق الهتولـي
ماني على ربعي قريـب محاضيـب =ادنـاة مايخلينـي اسـرج خيـولـي
ان جات من طيب شقاها على الطيب =لو انها اعـوج مـن رقبـة الذلولـي
وان جات من مسكين منطق واساليب =حطيتهـا بيـن الثـرى والنعـولـي
لاحركت شعـره ولاطلعـت شيـب =ولاضيقت صـدري ولاطـق جولـي
وان كان في صبري على ميلهم عيب= العيب تفتيـش الصـرر والحثولـي
لاقمت تذكر في رفيقـك عذاريـب =وتبيـن عيوبـه لـذولـي وذولــي
صبرك على ربعك علاج وتطابيـب =يقصـر حبـال السالفـه لاتطـولـي
حتى مايلقا فـي طرفهـا مقاضيـب =كـراه خيـر وللمشاكـل ميـولـي
واليا بليـت بتايـه شـره وصعيـب =يقول انا العـراف وانـت الجهولـي
قـل الله الله ياحصـان الاطالـيـب =يالفاهـم العالـم عطيـب الفعـولـي
هذا الكلام اللي مافي صحته ريـب =لانيـب لاحولـك ولانتـاب حولـي
حصان وبن حصان طيب مجاذيـب =وبالمعرفـه رجـل محلـي ودولـي
خله يروح يخطي الدرب ويصيـب =يقول مابالنـاس عرضـي وطولـي
والفرق ماهـو باللحـى والاشانيـب =الفرق بيـن النـاس فـرق العقولـي
كم واحد تحسن به الظـن ويخيـب =السـن يضحـك والفـواد معلولـي
واللي غدت به كلمـة مالهـا غيـب =ماهو من اطيب ربعي اللي غود لـي
يالله عساها صيحة فـي قفـا ذيـب =وقلـع النيـا بينـي وبينـه يحولـي
الرجل مايغصب على الطيب تغصيب =اليا صار ماهو دل ضمـن الدلولـي
ومن عادة اللي طيبه يحضر ويغيـب =لاطالـت الرفقـة زهـوق ملـولـي
واليا بلنـك غبـر الايـام بصحيـب =في مستوى طيبـه صعـود ونزولـي
اعرف ترى الدنيا دروس وتجاريـب =والكامـل الله والنـقـا للرسـولـي
لاتصير مشـذاب يقـص العراقيـب =خلـه وراع الاولـه وش يقـولـي
اخذت حكمه مـن كـلام اللواعيـب =للطيـب نـاس وللعـذارى فحولـي

الـــــشـــــاعـــــر :
لافــــــي الـغــيــدانــي