[محمد بن دويش]

من القلب وارجو ان تصل الى القلب







هني القدم لا داج في خايع ٍ صحصـاح
يشوقه هوا الغربي ليا هب مـن قبلـه
بلا صجة العالم ولا به بـزر وصيـاح
ولا عـوّد لبيتـه قـد الكبـد مندبلـه
تضيـق المدينـه بالمعنّـا ولا يرتـاح
مدام الخواطـر جوهـا منقطـع وبلـه
خذا سجة ٍ عن عالم الكـاذب المـزاح
جهام الصدور اللي لقاهـا بـلا قبلـه
صباحه على حس العصافير يـا فتـاح
تسبح لخالقهـا وهـو عانـق القبلـه
قضى الفرض في جو ٍ تجلت به الارواح
سمت بالدعا في ماطر ٍ منتعش ربلـه
وذا بهـر الدلـه وذا يفهـق المفـواح
وذا بالخلا سـارح ويتبـع هـوا ابلـه
عذاب الخلا لامن ذكرتك وانـا مرتـاح
كما اللي بحلقومه طرف موس ناشب له
ليا جيت في ذروة مراحك وقلبي صـاح
صياح البزر عوج النصايب تنصب لـه
على الرجم يا عاشق تسج القدم سواح
تعوّد على بيت ٍ على الرجم كاتـب لـه
تقول : الوفا بيت ٍ يعاند هـوا الاريـاح
متون الغـلا تسنـد عواميـده وحبلـه
كذب خافقك ولا كـذب خافـق النـزاح
حسافه عذاب الحب ما كنت حاسب لـه
لعل وعسى منهو وسم خافقي بجـراح
سمح خاطره يومه تعاقب علـى نبلـه
جمعت الغلا لكـن غلانـا بصـدك راح
كما النود لاهبت على السوم من قبلـه