ياليل لا تكثر علي المسافات ...
واسمع مدام القلب ينزف وريده
لعيونها ما نعرف المستحيلات ...
من حقها تامر على ما تريده
الله رفعها فوق كل الجميلات ...
والله جعلها في العذارا فريده
هي مبتدا عشقي ولا له نهايات...
متربعه عرش الحنايا وحيده
اوصافها ما تنوصف لي بالأبيات ...
كلما وصفت الزين يرفع رصيده
وان قلت لي وصف ترى العمر لحظات ...
بعطيك نبذه واعتبرها مفيده
ماهي من اللي لا تخطت سهالات ...
لا والله الا كل شي تزيده
فيها من السحر وعذابه دلالات ...
وفيها من أشواق الغلا ما يعيده
وفيها سكون الليل وأحلى الروايات...
وفيها من الخيل الجموح العنيده
وفيها من الضبي وعيونه علامات ...
وفيها شموخ الحر مطلع هديده
وفيها الدلع والغنج واضح اذا جات ...
كنها تقول ابشر ولك ماتريده
متسلطنه متسيده وعندي اثبات ...
متفرده عن جنسها بكل غيده
يعني كذا ولا كذا اسمع الآت ...
مادام جرحي ما توقف صديده
تبي الصراحة واختصر كل ما فات ...
في ذمتي ما تنوصف في قصيدة