السلام عليكم ورحمة الله وبركاته
انقل لكم قصيده مليانه جدا بالكحم الي اكثر من رائعه
لشاعري المفضل
ياربـي تسهـل الامـر وتزيّـن ألاحـوال=ترانـا بـلا رحمتـك هلّكـا ومتهـاويـن
ولا عندنا غيرك ليا صـك جـال(ن) جـال=ضعـوف ألاوادم ياقـوي فيـك متقـويـن
أبي رحمتك حـي وفـي القبـر وألاهـوال=نهار الحسـاب مشيّـب الرضّـع الولّديـن
لنا حقوق وعلينا حقـوق وماحـط يشـال=زمـان يخلـي ضاحكينـه مـن الباكـيـن
ماينزل بـه الراحـل ويرحـل بـه النـزال=ومواعيدنـا واجالنـا كـل شـي بحـيـن
فياحـظ مـن طابـت فعايلـه والاعـمـال=وياشيـن حـظ أللـي لاوحـده ولا ثنتيـن
هبـوب الزمـان وكنتـه والبـراد اشكـال=تقلب بـه الدنيـا واهلهـا علـى الجنبيـن
ولا اصعب على الصاحيين من كثرة الجهال=ولا اقسى على الجهال من سطوة الصاحيين
عسى الله يصيب مـدور الشـر بالسـلال=وعسانـا لاظـلاّم ولاحــن بمظلومـيـن
ولانطـرد المقـفـي ولانـكـره الاقـبـال=ولانخطي اليـا صـار مانقبـل المخطيـن
لو انهـم تناسـوا فعلنـا مانقـص مثقـال=من اللي تناسوا جعلهم دايـم(ن) ناسييـن
ولا تذكرونـا غيـر فـي حـزة الانـكـال=ليا اشتدت الازمة وخالط صفا المـاء طيـن
نطب الخطر والخوف والموت طـب هبـال=تقـول اننـا بمقابـل المـوت مستـريـن
بنفنـى وتفنـى عيالنـا بــس لانــزال=عزاز النفوس اللـي علـى حقنـا عييـن
على الراس كوفيه ومـن فوقهـا دسمـال=ومن فوق دسمالي عقال(ن) يميـل يميـن
ولـو ماتحـوش ايماننـا مـال مانهـتـال=لو الوقت عاري وجه عشنـاه مستوريـن
ابو خمسة لاقـل مـن قيمـة ابـو ريـال=فبو نصف يقدر يقتل احـلام بـو قرشيـن
مايوجعك يالسائـل سـوا جفـوة السـؤال=ليا صرت تقضي دين ظهرك بمثلـه ديـن
ولا فيه بيت(ن) سالم(ن) من بعض الاشكال=وهدّامـتـه قِـلّـه وبنّايـتـه كـثـريـن
لنا ماضي وحاظر مانبكـي علـى الاطـلال=مايبكي علـى الاطـلال ياكـود محروميـن
لهم ماضي(ن) حلوى لكن حاظر(ن) بطـال=وذولا عرب موتـى ولـو عادهـم حييـن
تقـل العوايـد يـوم تتعـاقـب الاجـيـال=وسلـوم الرجـال الاولـه تتعـب التالييـن
ولو نبكـي اللـي راح ياويـل حالـي وال=بعـد روّحـوا شيباننـا الزُحّـل الوافيـن
موصّيننا بالصـدق فـي القـول والافعـال=وفي جمعة تهتـاب مـن قوهـا الطمعيـن
غدينا شتات وحن عيـال(ن) علـى رجـال=رخصنا والاجناب اصبحوا عندنـا غالييـن
نحب الجمـل والحمـل ونعـذرب الجمـال=وهو اللي يقود الزمل من ويـن اليـا ليـن
من اول يـوم إن القـل والمـال ماينطـال=قبل شركة الكهـرب تنـور بيـوت الطيـن
يوم ان الرفيق اغلى من الروح والمنـزال=ويوم ان الرفيق ان غاب نفقده فقد(ن) شين
وذالحين الاخ يقاطـع اخـوه حيـل وحـال=ولـو حسّتـه الايـام ولاّ غـراب البيـن
اخوي ابن ابوي ان كان مايـردع العيـال=اليا عال فيني رحت به في ( سند الاثنين )
ابيعـه كـذا واشـرب ورا بيعتـه فنجـال=وانا دون عمري قبل يولـد الـى ذالحيـن
جروح العرب تبرى وجـرح الاخـو قتـال=وجرح العرب واحد وجرح الاخـو جرحيـن
ولـو يبتلـى والله ماخليـه ليـن يـهـال=علي القبر ولاّ أنتصر لـه مـن الغاوييـن
يقولـون جيبـك اكبـر اخوانـك العقـال=وانا اقول وقفة الاخ تسوى كنـوز الصيـن
عطاني الزمن كل شـي إلا مـره واطفـال=عسى الله يكمّل زينتي فـي الحيـاة اميـن
لاتحزن ولا تزعـل تماسـك وهـد البـال=ترى العاقل اللي يحسب حساب وقته زيـن
رفيقـك تحمـل لـه ثـلاث لاشـك ثقـال=لكن رابعته افطن لها واخـذ حـق وديـن
والاولاد وهبـه لاعمـام(ن) ولا بـخـوال=عسى الله يصلح ماعطانـا مـن الجنسيـن
(ياكم بنت هامل جـا ولدهـا بطـل الابطـال=وكم بنت شيخ(ن) جا ولدها قصيـر ايديـن )
(زكـاة العـوال معاكستهـا زكـاة الـمـال=لاطاب إلك واحد فدفـن عوالـك الباقييـن)
وسلاامتكم
علي بن حمري