[مسعطر]

من قديم الشاعر -- مُغنّاه بصوته --

قلنا متى الميعاد .؟ زاد الهمَّ زاد=يا اللّي فتلت ْقيودنا حِلّ القياد
انا الأسير اللّي مُحيّر من سنين=كم حِسبة ٍ كِثّر عليّ ْحسابها
خطاك جر القلب من وسط الحشا=تلعب بنا لعب المحالة بـ /الرشا
فينا ترفّق لا يجي قلبك متين=ارحم ترا الرحمة وسيع ٍ بابها
بوجودكم نسمر ْبـ /ساعات الرّضى=و ْنجدد المبنى و ننسى ما مضى
العشق يطبع في قلوب العاشقين=طبعة حروف ٍ طبعت بـ /كتابها
و انت الّذي حبك يزلزل بـ /العقول=و انت الّذي من شاف زولك وش يقول.!
يضيع فِكره بين خدّك و الجبين=و عيون تاخذ عسكر ٍ بـ /حِرابها
جرحتني جرح الحديد ْبسلك ماص=حملتني تسعين رطل ٍ من رصاص
هذا خطا يا صاحب الوجه الحسِين=خلّيت عدواني تحدَّ أنيابها
و الشجرة اللّي قد سكنت ْبـ /ظلها=ذيك السنة خضرا و انا جار ٍ لها
كم ليلة ٍ عشنا تحتها سامرين=و الروح ما تسلا بغير أحبابها
و أقول يا ليل الحلا ليتك طويل=حلحلت حالي حلحلة حل الرحيل
و اللي بنا الكعبة و ذيك المسجدين=إنّ الحبايب ما نجوز إلاّ بها
و أحبابنا من دونهم ذيك الحدود=اللّي مطوقة ٍ بصفات الجنود
تحت السما فوق الأراضي عايشين=تبكي عيوني و الفراق أسبابها
و أسبابها الفرقى بعد كِنّا جميع =نلعب مع الأشجار و أزهار الربيع
في ليلة ٍ ما ناضرونا حاسدين=ذيك اللّيالي ليتنا عشنا بها
يا مغرق العاشق بـ /لجّات البحور=الميتين ْمن الهوى نصف القبور
على هواك يهزني شوق و حنين=كلمتك لو هي ضدنا نرضى بها