السلام عليكم ورحمة الله وبركاته
هاذي نشيده نشدتها في ولدي من مده طويله ومازلت كل ماشفته شليتها له
اتمنى ان تمتعكم كما امتعتني
وأقول فيها:
يا سعود لك بين الحنايا محلا=ما يسكنه غير انت من بد الاحباب
يا سعود حالي امن الصواديف والا= والقلب شارد والفكر عنك ماغاب
يا قرم لا شفتك همومي تجلا= جلسه معك تسوي بعيدين وقراب
حبك تملا في خفوقي تملا= حبك يشق القلب وللضلع حطاب
حبك كما نجمه حبك تعلا=حبك يرد الروح في حال منصاب
يا بيك ماقيلت على اللين كلا =انا حزامك عزوتك يوم الانشاب
لا جاك في وقتك تكادير وألا =ابشر بمنهو باللقا يفتل أشناب
سميت يا سعيد على اللي تولا= قدره كما الفاروق عمر بن خطاب
ابغيه لك نوماس لجل اتسلا= سميت باللي به صعاطير واحناب
ابغيك مثل سهيل كلن يدلا=للمرجله والجود ابغيك طلاب
ومكارم الأخلاق فيها تحلا=وخاو الرجال اللي عريبين الانساب
لا كبر المذن وقوم وصلا =كبر معه واطلب غفورن وتواب
واركع صلاه الرب خوف وذلا =من غيره الخالق له العبد يهتاب
والصبر خله لك عشير وخلا =واحذر تقول الزور لو راحت أرقاب
واحذر تكابر بالغرور وتعلا =أعلم ترى آخر مساكنك فتراب
لا جاك مسكينن زمانه تبلا= لا تتركه تكفا ونا ابيك منصاب
أرفق بمن جاه الزمان المذلا =يرحمك من فوق السما يوم الحساب
تكفا وأنا برجيه عزا وجلا =الواحد اللي من ترجاه ما خاب
يكفيك من عين الحسود المغلا= ويشفيك من عنده شفى دون الاسباب
ويرزقك فالجنه جنه وفلا =ويجعلك في الدنيا على الخير بواب
وسلامتكم