السلام عليكم ورحمه الله وبركاته
مسيكم بالخير جميع؟
حبيت أشارك هالكوكبه الرائعه من شعراء المنتدى ,, وأضع بين أيديكم هالمتوآضعه عسى تنال أعجابكم
//
//
البارحه كثرت علي الهواجيس = قامت تلاعبي على غير مقياس
أسمع طبول الراس تضرب مراويس = وأصبحت في بحر الهواجيس غطاس
يلعنبوها من بنات الأباليس = هاجوس يسري بي وهاجوس رواس
قامت تهايالي كثير الكوابيس = خطر علي اليوم في قطع الانفاس
حملي ثقيل وزايد(ن) بالمقايس = والشيب بيّن من خوافيه للراس
والوقت جاير والليالي معابيس = والحظ طايح في ذرى الوقت منداس
والعين تحبس دمعها بالمحابيس = تخاف من بعض البشر وأكثر الناس
أهل النمايم والحكي فالمجاليس = ناس تغرس الشر في دربي غراس
بعض البشر ياحبها للدنافيس = اللي لها وجهين وقلوبها أنجاس
الله خلقهم في زمان المتاعيس = لاطاب مقعاد(ن) ولا جاز مجلاس
ضاقت بي الدنيا وكثر الوساويس = أصبر على ذالوقت وأقول لاباس
لابد من يوم(ن) تهب النسانيس = تشرق علي الشمس ويهب نسناس
وأسقي عروق القلب وأروي الميابيس = وداعب أوراق الزهر وأطرد الياس
لاشك من يوم(ن) تهد القرانيس = والحر له في ساعة الوقت مفراس