بديت بقـاف مرسـلات معانيـه = للصاحب اللي ضيع الدرب واخطاه
عسى شيطان الأنس مهوب مغوييه = ولاعسى ماغـره أبليـس وغـواه
عجيب يـوم أنـه تنكـر مباديـه = يلعب بزين الوقت وشينه بينسـاه
كيف انه ارخص من يوده ويغليه = وهـدم جسـر بالمـوده بنينـاه
اما ضـاع وضيـع الله مراوييـه = بسـواد ليـلاً مدلهمـا بمـسـراه
ولا بربيع العمر حسـن مساويـه = ماكل غمرا تكسب الطيـب يمنـاه
على الهفوات وردنـه هقاوييـه = وانا مداي بعيد مايلحـق اقصـاه
أقرا لغة العين وأعرف مغازييـه = وأفهم كلام الناس واصلح خطـاه
نفسي عزيزه وارفع الراس واعليه = واطى على ظهر الردى واتخطاه
من باعني بعته ولا نيب شاريـه = ماهمني من غير الوضـع مبـداه
لايحسب اني عايشٍ في رجاويـه = رجاي باللي كون الغيث وانشـاه
لاشك لاسمعت انا اسمه وطاريـه = يحز فى نفسـي وقتـا قضينـاه
يكود من غيـه يرجـع لماضيـه = ويعيد مجرى السيل الاول لمجراه
انا رفيقـي بالمـوده مصافيـه = افرش له عين وعين له غطـاه
اما يرجع واقول ربـي محييـه = ولا مراح مقيط يوم لحق ورشاه
يلقى من الخلان من هو يسليـه = يمشي على موده وضنه ومنحاه
للشاعر ضيدان بن محمد الدوسري
