ياللي غيابك طال وأنـا أتحـراك
حرمتني قربك وأنـا ميت(ن) فيك
ليتك تجي وتشوف حالي بليـاك
حـالي يسر عداي وشلون يرضيك
ليـه البطا يا نور عيني وأنا أهواك
الله يصـبرني علـيك ويجـازيك!!
تذكر أيام(ن) مضت عشت وياك
مـا كـان همي وقتها غير أراضيك
طلبتنـي قلـبي وأنا قلتلك هـــاك
بعطيـك قلبـي وأحفظه بين أياديـك
ترعـاه بعض أحـيان وأحيـان يرعاك
يـاكبر حـظ اللي بقـلبه يـراعيــك
أسهر مع طيفك وأعدد مزايــاك
جلا جـلال الخـالق اللي مسويك
الله عطاك الزين مافيه حلــياك
مـاتعرف المكياج ربي محليك
جعلك بعد ذولا وذولا وذولااك
لو قلت لك بنساك ماني بناسيك
تعال يا المزيون والروح تفداك
حالي يسر عداي وشلون مرضيك!!