[بطاح]

بسم الله الرحمن الرحيم

قصيدة رائعة للشاعر مهذل بن مهدي الصقور رحمة الله :-






ياذيب ياعاوي في عالـي هضابـه
منك العوى نوحيه في مرقبك فـوق
اقنب ومـن حولـك جيـاع الذيابـه
بيّتني درك عسـى جنبـك العـوق
بيّت من هاجـوس قلبـه غـدا بـه
سمٍّ على قلبه مـن العـام مسحـوق
تنعـاف دنيـاً تاليتـهـا خـرابـه
طرادها من طارد المـوت ملحـوق
فبها الردي يحصل على مانوى بـه
ويغبن بها نـاسٍ وفييـن وصـدوق
المال ينفـع صاحبـه لاإحتمـا بـه
وله مركزه بين الرجاجيل مرمـوق
واللـي فقيـرٍ يبغضونـه قـرابـه
في حاجته ماله من النـاس مخلـوق
والطيب اللـي مـا يصفـي حسابـه
يصبر على مـرّ العذابيـن ويـذوق
والوادي اللي كل حـيٍ رعـى بـه
الحرّ مالـه فـي مراعيّـه احقـوق
والعزّ من يهوى طريقه مشـى بـه
والنّاس كلاً لـه هوايـات وطـروق
والصّقر مخلابه يـرد الغـوى بـه
والبوم لا يصفق ولاهـو بمصفـوق
والصدق نورٍفي الدجى ينسـرا بـه
والكذب غدراًمالها شمـس وشـروق
واللي يحسب حساب هرجٍ حكـا بـه
هرج القفا ما يلحقـه منـه منطـوق
والشيخ تعرف حكمتـه مـن جوابـه
والشّور مايختص به كـل مطفـوق
ومن جا على الذاري تحـرّق ثيابـه
ومن عارض المقفي تجي كبده حروق
وشيخٍ بـلا ربـعٍ وعـزوه ولابـه
مثل الفواد اللـي بـلا دم و عـروق
والنذل لا يغـزي ولا ينغـزى بـه
وبين العرب تلقى علامات وفـروق
أحـدٍ إلا غـاب إفتقـدنـا غيـابـه
وأحدٍ يغيب ومـا نخصـه بمشفـوق
ما يستـوي غيـم شحيـح سحابـه
وغيـمٍ مخاييلـه برعّـاد وبـروق
اللـي يـذوق الضيـم مـرٍّ شرابـه
لابد ما يصفى لـه الكـاس ويـذوق
قلته عن أصحـاب العقـل بالنيابـه
كـلام قلتـه يفهمـه وافـي الـذوق
حمامي اللي جـرّ صـوت اللعابـه
اهتزت شجون بن مهذل من الشـوق
ذكرتني صـورت ضبـي العدابـه
ما لي سواه من المزاييـن معشـوق
في سوق حب اللي حكمـت الرجابـه
أغليت سوقه لين عجزوا هل السـوق
ياأعزّ وأغلى مـن هلـي والقرابـه
ياللي على نفسـي مأمـن وموثـوق
لو قلت سق روحك لموتـك جلابـه
لاسوقها واسوق معها العرب سـوق