خطاك الشر
سلامتك ياوطن والله
من الحقد اللي ماليهم
سلامة عينك وقلبك
سلامة فرحة أطفالك
من الشوك اللي بيديهم
سلامة ظلك الوارف
سلامة نخلك الواقف
غصب عن ريح ظلمتهم
وظلم المعرفه فيهم
سلامة صبحك الطاهر
من عاصف لياليهم
سلامتك ياوطن والله
سلامة ضحكة عيونك
سلامة صوتك الخيّر
ونور الحق على متونك
سلامة "الله أكبر" فــ المساجد
والقلوب
وهقوة ظنونك
سلامة روحك السمحة
بياض ايديك
ربيع حبك
سخا مزونك
سلامة خضرة غصونك
شلون تقدر
يد اللي تلمس ترااابك
تخون الله وتخونك؟
سلامتك ياوطن والله
سلامة ماك .. وترابك
سلامة كل ندى يقطر
هوى ويسيل على أعشابك
سلامة حلم أحبابك
سلامة كل شبر منك
وكل مافيك
وكل صوت يتغنى بك
سلامة كل "هلا" تنقال
من قلبك قبل بابك
سلامتك يابعد روحي
خطاك الشر وماصابك
تعال جروحك جروحي
وعمري فدوة لاهدابك
تعال حط راسك بصدري
وصدري يزهر ويدفي
ويفرح ويتهنى بك
[مسفر الدوسري]