جازيت وصلي بآخر الوقت هجران
شحيت في وصلك وزايد حنينك
خليتني عايش بفرقاك الأحزان
لامرني طيفك اناديه وينك
عانيت من صدك ولاكنت غلطان
غير اني سلمتك خفوقي بدينك
عطني على هجرك وفرقاك برهان
خلاك تجزي بالتجافي ظنينك
لاتنكر اللي جاك مني على شان
تذكر معي بالحب ماضي سنينك
انا عطيتك كل غالي بالاثمان
ارخصت عمري كله لشان عينك
شلتك بقلبي ماتناسيتك احيان
ينك تملكت الاحاسيس لينك
واليوم تجزاني بلوعه وحرمان
وتترك حبيبك بإشتياقه سجينك
نسيت لحظة جفا كل ماكان
نهاية الحب وقعتها يمينك
دامك مشيت برغبتك والجفا بان
خل الليالي زمانك تدينك
ماني على من يقتل الحب ندمان
لوكان قلبي بالمحبه رهينك
اصبر على الفرقا واجازيك نسيان
ولاتذكر شي بيني وبينك