ثلاث كلمـات مابـي منـك اسمعهـا
بحروفها اللي علـى الاعـذار مستنـه
لا اغلطت لك غلطـه وودك ترقعهـا
تقول : مدري .. واحسبنـه ..ويمكنـه
مدري واحسبه ويمكن .. عني إقلعهـا
مخي خلاياه من ذا اللفـظ .. منجنـه
دور لغيري .. وسولف له .. ووزعها
دوّر لمنهو يحنّـك كـذب .. وتحنـه
ياللي تـوزّع علومك..قبـل تجمعهـا
لاصن صاحبكّ فإلعب وايتـه بصنـه
واترك طبوعٍ بلا داعـي .. تطبعهـا
وارجع على (اصلك) بلا شكر وبلا منه
لا تخلف الهقوه اللـي فيـك مطمعهـا
ماعاد ينفـع معـك (لكـن) و(لكنـه)
شف موقعك ..والعرب وشلون موقعها
والنـاس نظراتهـا سكيـن منسـنـه
ما فيـه كلمـه تنزلهـا ... وترفعهـا
لا تخلط الصوت بين ..البـح والخنـه
والمعركه لاجهَلـك اللـي .. مولعهـا
شف برقها لاح ..والرعـاد لـه دنـه
ان كان عندك علومٍ خافيـه .. ذعهـا
ما فيـه تكتيـم دام الحـرب منشنـه
وان غشتـك صنعـةٍ كـلٍ تصنعهـا
ماتـوك الا عـذاب القلـب والـونـه
وان غرتك لقمةٍ فـي البطـن تبلعهـا
بذكرك في كـلام (الشـرع والسنـه)
(الركعه اللي على الانظار .. تركعهـا
هي تدخل النار والا تدخل الجنه.!!؟؟)
خل الدعـاوي لشاريهـا .. وبايعهـا
كـلٍ علـى مهنتـه ويكيّـفـه فـنـه
والفزعه اللي نويت العـام .. تفزعهـا
لا تحسب انها بوسط الصدر .. منكنـه
انا عزومـي تشجعنـي .. واشجعهـا
واشجع اللي يجي ظنـي علـى ظنـه
وانت انتبه مـن علـومٍ .. ماتوقعهـا
ولسانك افطـن لهـرجٍ ينطلـق منـه
ثلاث كلمات مابـي منـه .. اسمعهـا
كلمات : مدري .. واحسبنه .. ويمكنه