[صقر الشمال]

ياللي طلبتـم نبـذة مـن قصيـدي -- عن واقع المفعول لا أنقص ولا ازيد

انا غرامـي وانبساطـي وعيـدي -- تفريعة القرناس بأرض بها صيـد

لا شطب الصيحان روس الزبيـدي -- والعشب جالـه بالمثانـي عناقيـد

والبـدو مايبـدي لهـم بالشديـدي -- تسعين ليلـة ماحكـوا بالمواريـد

ضيق بهـم در الغنـم والجميـدي -- مايشربـون إلا حليـب المجاديـد

والبل وبرها طار وأبـدل جديـدي -- وردوم على الفاطر سوات المجاليد

من فضل ربي كـل يـوم تزيـدي -- قامت عشايرهـا تسـن المفاريـد

والفجر تسمـع للطيـور اتغريـدي -- ليل الشتاء طوله عليهـن سراميـد

هذيـك والله منوتـي ياعضـيـدي -- لا جابها الله من صدوق المواعيـد

ماكفـه الديـر لرجـم المفـيـدي -- وذوب على خشم الخدار ومشاحيـد

مجهود من نـو الجبـه السديـدي -- وحصل لها قبـل العقـارب تماديـد

غثوه على روس الشجر والهضيدي -- وساق وتساقـي للنفـود وتخاديـد

وفيض على فيحان ريف البعيـدي -- نبي لنـا بشعـاف لوقـه مطاريـد

علـى اسـوق مقربـات البعـيـدي -- من فوقهن يازيـن مـزح الأواليـد

لا فـرع النـادر وطلعـه وكيـدي -- وحول على جول الحبارى تقل حيد

وسلط على الخرب النشيط العنيدي -- حاسه وداسـه والحبـاري ملابيـد

يقضي بها الصقـار يـوم جديـدي -- في ساعـة مابـه وجيـه مقاريـد

هذا هوى بالـي وهـذا رصيـدي -- سوق النظر بين السهال الجراهيـد

لوكان من طرد الولـع مستفيـدي -- فتق بقلبي واعذروا يـا الأجاويـد

نومي تحت طل النجـوم الجليـدي -- عـن كنـب ومنجـد زل تنجـيـد

لو لامني خطـوا الغشيـم البليـدي -- طرد الولـع مابـه عليـه مناقيـد

وشف الفياض المخضره يالحميدي -- وشمة ذعاذيع الهوى عندنـا عيـد

وللكيف ذوق ولاستمـاع النشيـدي -- لا قلطـوا رسـلان والا بغـاديـد

ثنتيـن هيـل وثالثتهـن عويـدي -- وكل على ماتطلب النفـس وتريـد

وقدوعهن من طلع هدب الجريـدي -- احسن نمونه من نما شـرع الغيـد

وسوالـف ماقيـل فيهـا جحيـدي -- بالصيد لا نمـة ولا هـي هرابيـد

ساعات نقضيهـا ويـوم سعيـدي -- ولادامت الدنيا لعامـر وابـا زيـد

الـدايـم الله والفـنـا للعبـيـدي -- والرزق عند منـزل الـدر بالديـد

محي الهشيم اللي عروقه هميـدي -- رزاق ماتحت الصخـور الجلاميـد

والله يدبرنـا عـلـى مايـريـدي -- وصلوا على اللي وحد الدين توحيد

تحياتي/صقر الشمال