السلام عليكم ورحمة الله وبركاته..
هذي أول مشاركه لي واتمنى انها تحوز على أعجابكم...
ولاتحرمونا من نقدكم وأرائكم
ياشاجع ابن عوير مسيك بالخير = قدلك ثمان ايام وين انت غادي
موترك خبط وأتعبتك المشاوير = من راس مرقابن الى بطن وادي
وينك تلاحقني ترا ماني بخير = ابغي ترد العلم للي ينادي
الوضع يبن عوير يحتاج تفسير = الوضع مؤسف وانت تفهم مرادي
حنا ال عرجا هيه يا نافخ الكير = حنا هل الفزعه كعام المعادي
يومه زهمنا الشيخ في غزوة مطير = ولازهمنا الا وحاديه حادي
محدن تردى كلبينا مناعير = ومحدن تأخر يوم نادى المنادي
وكلن يحث اللي وزانه على السير = ايلين جينا ثم غزينا هجادي
في الصلب حنا اللي حمينا المظاهير = على الوغى ماحن نبدي الرقادي
هذا الدليل انحن نسمى مظافير = وانحن هل الطولات..هذا وكاااادي
شوي لكن حن نهد الطوابير = شوي لكن كنحن جن وادي
صغيرنا يصمل..ولو عاده صغير = ويشيش راس اللي عده في المهادي
وفقيرنا يفرح لاشاف المسايير = ويذبح لهم...لو يذبح ام الشدادي
وآذاننا ماتنطرب للمزامير = تطرب على الحرب وصهيل الجيادي
وايديننا ماهي تحفظ الدنانير = نعطي وننسى اللي عطته الايادي
ماخلق فينا اللي يحسب المخاسير = وما خلق فينا اللي يخون المبادي
ومن ضدنا يبشر بخزم المناخير = لين يهديه الله...والله هادي
ولاضير لو يخطون الاقراب لاضير = نصبر على الاقراب صبر المهادي
لكن لاضقنا نسوي المناكير = حتى يميز الابيض من السوادي
نصبر..لكن نشيش ونطيش ونغير = وماحن نسمي لاهبدنا الرمادي
الكل منا وسط راسه سعاطير = والطيش فينا فعل ماهو أرادي
اقرب مثل.. لامن قصد (سالم جخير) = فأنكاني ما ششت مانيب بادي
في ذمتي كني من القاع باطير = وأحس في دمي خلايا جدادي
ياقوووم يا عنتر ويا سالم الزير = لامن وصف جداننا في الجهادي
أفعالنا تنعد ضمن الاساطير = والوحش يشبع لانطحنا الاعادي
والعذر لامن صار في الحكي تقصير = ماقلت غير اللي عرفته وكادي
من عقب ذا برسلك يا شاجع عوير = للي سكن بقصى حنايا فوادي
لامن طرت قمت أزعج الصوت واسير = والله ماعاد يهنالي قعادي
تأثيرها في داخل القلب تأثير = صوت السديس الا غدا الجو هادي
وخدودها كنك تشوف النواوير = ولون الجسد يشبه للون الزبادي
وطعم الثغر كنه حليب المصاغير = وريحت نسمها كنها ريح كادي
ونظرة عيونه كنها نظرة الطير = مجوعه راعيه وقت الهدادي
في دمها خفه.. وفي طبعها غير = وفيها دلع وأسلوب ماهوب عادي
ومن الدلع ما تدعي الا بتصغير = والا دعت.. يهتز حتى الجمادي
وعدها تحاتي الحب..وتشك..وتغير = وتقول: أخاف يخون قلبك ودادي
فلاجيتها قل قال: مسيش بالخير = الحب عاده.. لكن الشوق زادي
وان ما عذرتي رجلي امن المشاوير = قولي معي جعل الله يعين بادي