النور شعشع يا ديار المجـد وديـار السـلام=والتمّ شمل اهـل القلـوب العامـره بايمانهـا
والمشهد ابلغ من حدود الوصف وسمان الكـلام=في بيت من حفـْظ العهود الماضيات وصانهـا
شيـخ ٍ ورد عدّ المكـارم والــولا ورد الحـيـام=الصدق مبدا والمبـادي ثابتـه مـا خانها
يا مرحبا يا سيـدي ترحيبـة ٍ تجـلا العسـام=فـي ليلـة ٍ تباشـرت فـي جيّـــتك شيبانهـا
يامشعل ابن سعود ياللي في يدك حبل الزمـام=ياراعي البيـرق ليـا شـبّ الوغـي ميدانهـا
انت تـّلالا مثل نجم سهيل مـن فـوق الغمـام=يابـن الملـوك اللـي تشيـّد بالوفا بنيانـهـا
يوم المخافـه والديـار قفـار والدنيـا ظـلام=ما همّهم ساقـوا الركايـب واشعلـوا نيرانهـا
عصبة هل العوجا ليا اهتزّ الصليب من العظام=سيوفهم تصدق وصيحات الظفـر عنوانهـا
يا يام يا همدان يا ربعـي هلـي يايـام يـام=اليا ارتفع صوت العـزاوي واشتبـك دخـّانهـا
يا مرخصين الروح دون الحـدّ في يـوم الزحـام=يااهل المهار اللي ينومسهـا فعـل فرسانهـا
قوموا ارفعوا البيضا لبو فيصل معزّه واحترام=وقولوا له انـّه تـاج نجـران وسنـد سكـّانهـا
يا سيدي والعفو عند المقـدره طبـع الكـرام=اللـي رفـع ربـي منازلهـا وعـلاّ شانهـا
ننخاك باسم اللي اختنق بالدمع من قبل المنـام=عود ٍ فقد غالي وفاضـت عبرتـه باحزانهـا
شوفه قصر ويجرّ صوته مثل نايحة الحمـام=قـام يتلفـت للجبـال اللـي بكـت وديانهـا
يصيح باسمك وانت مشعل مشعل اللي مايضام=القول قولـك والقضيـه فـي يديـك ِ عْـنانهـا
يكفيك لامنـّه رفع كفـّيـه فـى البيـت الحـرام=من دعوته سبع السمـاوات اشـْرعـت بيبانهـا
يا سيدي ما فات مات نقولها فـي كـلّ عـام=حنـّا معـك نرفـع مبانيهـا علـى عمدانهـا
ارفع حجاجك في نهار الضيق حنـّا لك حـزام=حنا لهـا لا شمّـرت قـوم الـردي سيقانهـا
عيون مواطـن سمـوّك دوم ياعالـى المقـام=لا ذعذع البرد التحـف يـا سيـّدي باجفانهـا
عبدالله عبـيـّان