هيه ياللي دايم تجيب العلم وترده
والله اني فالمواطي ما بنيت شراعي
الليالي علمتني علمها من مده
قالت الدنيا تجارب والرجال انواعي
يا رفيق الضحكه لسانك تعدى حده
وظني ان بعض السوالف ما لبوها داعي
كانك تحسب ان كلامك هجمة مرتده
والله ان هجمتك ضاعت وان كلامك ضاعي
والجبل ان كان قرون التيوس تهده
فانت تبطي عظم والله ما لويت ذراعي
انت مثل اللي يبي له لطمة في خده
لين يبحث قبل مدخاله عن المطلاعي
ولا انا رجل يموت ولا يبيح سده
وان غفت عينه عن العالم فقلبه واعي
الركاده حطها الله خاتم في يده
واللقافه كبها للي وراها ساعي
الصديق اللي يضد اللي يبيلك ضده
لاتفرط في غلاه ان شانت الاوضاعي
والرفيق اللي معك وده ولا وده
اختصرها ولا تدور من وراه اطماعي
والرفيق اللي يعدك في الشقى وتعده
رفقته تشرى على الدنيا ولا تنباعي
والرفيق اللي ماينفع في الرخاء والشده
رفقته تدفن بقاعٍ ما وراها قاعي
ما اطيب اللي لا بداله في لزومٍ سده
لو ما يلقى في لزومه غير كثر اوجاعي
ويقطع اللي ينعرف خاله ويعرف جده
وكل يومٍ وعلمه اللي خايب يشاعي
وما اخبل اللي حط نفسه شيخٍ ما حدٍ قده
وهو على الدنيا راعي وجده راعي
للشاعر فهد المكودر القحطاني