العرجاني ينخى فزاع في ابن الذيب
للطيب باب وللردى عشرة أبواب=طول الدهر فتـّاح محدن قفلها
مفتاحها وأقفالها فعل وأسباب=وفي الآخره كل النفوس بعملها
أما في الدنيا فلاني بمرتاب=بقولها لو كان ماقيل قلها
لحدٍ يقول إن الشنبات لعقاب=أولى بها حمدان شوفوا بدلها
واللي طموحه في العمر حصد الألقاب=يحدد آخر نقطة له وصلها
ونشوف ماودا بنفسه وماجاب=يمكن ردي الرابعه يفتعلها
وتدرون ويش الظلم ياأصحاب الألباب=إيلا نسبت الحاجه الغير أهلها
وجهة نظر مانجبر أصحاب وأجناب=أما رفضها الرجل ولاقبلها
وأنا نسبت المرجله رجل الأنساب=ياشيخ عذبات الفكر فيك ولها
أنت الذي في الضيق فكاك الأنشاب=لاعقـــّدت صعبات الأرياء فتلها
فزاع يافزعة خويه إليا غاب=لاثقلت حمول الخوي تحتملها
خويك ابن الذيب بيدين قضَاب=ينخاك يارجل الصعاب وجملها
حتى ولو في بعض الأشياء أذنب وتاب=حدوه بسلوم الجدود ودخلها
مانقبل الهانه ولو راحت رقاب=قبيلةٍ الها تواريخ ولها
فعايل يدري بها سيف وكتاب=أما كيان الحكم لا ماشملها
واليوم يافزاع مانيب كذاب=يام على رجواك ماقل أملها
الظن فيكم ياأبيض الوجه ماخاب=شيخ الشيوخ ونور الأرض وجبلها
ماضاع حق وأنت ياشيخ طلاب=تشيل هم الغير والغير يلها
وإن كان للفزعات رجم ومرقاب=غيرك على طول الدهر مادهلها
لوه بكيفي صرت للجود كساب=فعايلك شخصيتك بنتحلها
وأصير لضعوف العرب سور وحجاب=وأغير أحداثٍ كثيره فشلها
ياشيخ في شخصيتك كل الأطباب=والله على فعل المراجل جبلها
تكفى وتكفى مالها بشوت وثياب=نزهمك ياشيخ العرب وبطلها
لايبطي ابن الذيب من خلف الأبواب=قل تم ياشيخ الشيوخ وفحلها