لبيه صوتٍ من الهاتف يناديني = وإن بدلت صوتها داري بمقصدها
ماهو بشخصي ولا طبعي ولا فيني = لا تختبر عاطفة نفسي وتنْقدها
شريت حبك مثل ماقلت شاريني = وعهودنا اللي مضت ماني بجاحدها
ماكل زولٍ تشوف العين يغريني = نفسي على المشرب الأول موردها
أول شبابي وتالي العمر ملهيني = حتى هلي ساعة لي جيت مقعدها
يا اغلى من الروح ياشوقٍ مخاويني = يافرحة العمر في دنيًا نكابدها
رسمت لك صورة في داخل العيني = صورة وفاء ماحد يقدر يقلدها
وبين الحنايا وضعتك بالشراييني = تسرح وتمرح وتغضبها وتسعدها
وعلى حياتي بتامرني وتنهيني =آمر تدلل ، نعم دايم ارددها
بس الرجاء ياحياتي لا تجافيني= وكرامتي وإن عشقتك لا تهددها
لولاك ماشيب راسي ظاهر فيني = ولا المحاجر بدمع العين مجهدها
ولا نسيت الحضر هم والبداويني = ياسيد كل العذارى يامهجدها
ياجادل وصفها داخل دواويني = ولولا الحياء كان ديرتها محددها
إن جيت للوصف شعري ما يكفيني = ويش القصايد معك ؟ لو جيت بقصدها