ضـاقـت وفي وجهي تـصـك الشـبابيك = دنـيا علـى ولـد الحـموله ثـقـيله
حــاولـت اجـاري مـشــيها بالتـسالـيك = وازريت اواصل حـملتي بالفضيله
نــســـمع يـقـولـونـه تــصـدك وتـعـطـيك=مـاشـفـت انا من لونها غـير ليله
اووووواه يــــادنـــيـا كـــثـيــره بــلاويــك= زادت علـي حـمـولها فـوق مـيله
يـصـعب على مثلي تسـلـق مـبانـيـك =اللـي علـى جدرانـها انهد حيله
مـانـيـب نـاقـص هم فـوق العنى فــيك= ولانـيـب حالم في قصـور وخميله
ولانـيـب من ربـعـك ولانـيــب شــاريــك = ولانــيــب من يـتبـع دروب الرذيـله
ولانـــيــب من دور ورى قــصــة الشـيك=ولانيب من ربع الـردى والفشيله
حـلـم بـدوي مـــغـمـور ماهوب ناســيك =في دلـتـه مســمـار ويـزيد هـيـله
لاتــذبـحـيـن الــروح لـو كان تشــكـيـك =من يشتكي من ضـيقـته طـال ويله
وان كـان مــابــالحـيـل عــزمٍ يـجــاريــك =نصـيـت انا ذيـبـن ذراعه طـويله
ياحـــزام ابـن حـثـلـين جــيتـك ونـاصيك =وانـخـاك يا نسـل القـروم وسـليله
جـيتـك علـى مـدح البـشـر دوم تـطريك=كلــن يقـول حـزام مـامـن بـديـله
هــداج تـيــما يشــبهـك فـي مــباديـك =واللي مـثـل شرواك يـبـعد مسيله
ورث الــرجــال اللـي عـلـومـه تــدلــيـك =درب المـعالي بـيـن ربـعه وجيله
تـمشي ولا في يـوم خاب الرجى فـيك =سـتـر الضعيف ومـن بغالك تجيله
وقـبـل الـخـتام اطـلبك تسـمـع مـناديك =والعـذر كـان القـول شـايف مـثـيله
مـانـيـب شـاعر جـاك يـمـدح مـعـالـيـك=حدتـنـي الــدنـيـا ولا فــيـه حـيـله
جـيـتـك ضــعـيـف وزابـنـك مــايراعـيــك=حـمـلي ثـقـيـل وانـت كـفـوٍ تـشيله
مــثــلك كــبـيـر ولاتـــوفــي مــعـانــيـك=ابـيـات شـعرٍ صــغـتها بلون شيله