السلام عليكم ورحمة الله وبركاته
اسعد الله اوقاتكم بكل خير
هذه المتواضعة تستقبل ايام الوسم وعسى ان يمن الله علينا بإمطار الخير والبركه على جميع اراض المسلمين وآمل ان تنال على ذائقتكم
.
.
.
ياحي برقه لابرق تالي عصير=يبرق ورى متن السحايب بنوره
سودن من القبله تسوق التباشير=اول ليال الوسم اول بكوره
وصوت الرعد يدوي بصم المظاهير=حدره ربابن مكتسي في نشوره
هبت هبوبه في حقوق الشخاتير=وريح المطر زاهي بنفحت عطوره
وصوت المطر يسوى رنيين المزامير=اسمع وشيمه قبل ياتي حضوره
والجو رايع فاق كل اتصاوير=في صورتن مامثلها اي صوره
من بعدها شبيت ضو المسايير=في فيتن تسوى المدن مع قصوره
بيت شعر مبني وصفرن مباهير=والهيل من نار العبل زاد فوره
مع نشاما كلبيهم مناعير=والعود الأزرق فايحن في بخوره
والهم والضيقات ولت مدابير=والكل يضحك منبسط من شعوره
خطلان الأيدي مابهم أي تقصير=من فعلهم شر الزمن غاب جوره
بدرب المراجل عجلوا خطوة السير=لوكان كايد ممتلي بالخطوره
.
.
.
وسلامتكم