اقتباس:
المشاركة الأصلية كتبت بواسطة بندر العجمي
ابوعبدالرحمن
ارنا شي من ابداعات الشعريه في النظم والمحاوره ونريد اكثر من قصيده ؟؟؟ 
<===== اصبحنا واصبح الملك لله |
مرحبا والله ومسهلآ يالغالي 
وطلباتك على العين والراس 
وهاذي طال عمرك قصيده رد على ولدي اللي انا خاله
قبل 4 سنوات تقريباً وكان عاده فالمدرسه وعمره 16 سنه
أرسل علي مسج يشتكي فيه ويتوجّد 
في خمس ابيات بعضها فوق بعض 
وأذكر فيها بيت يقول:
يا خال انا راسي على الدوم عالي = لكن هموم القلب خلّت الراس شيبه
ورديت عليه بهالأبيات المتواضعه وإن شالله تحوز على رضآكم :
يفزّ القلب لامنه وصلنا الخط من غالي = كما فز الوحش يوم أكمل الصقّآر تدريبه
هلا بنسل الرجال اللي لهم فالطيب مدهالي = هلا يامرحبا بك يا ولـدنا اللي نماريبه
هلا باللي عريبٍ ساسه إمن العم والخالي = هلا باللي جدوده كاسبين المدح والهيبه
توكلنا على جزل العـطايا الواحد الوالي = نبي ننصـح ولدنا لجل ما تاتي به العيبه
يا (سالم) إستمع مني وحط العلم فالبالي = ترى الأيـــــام عجلاتٍ بلا شك وبلا ريبه
صلاة الخمس فالمسجد تراها خير الأعمالي = وبر الوالدين امرٍ شفيع الخلـق موصي به
وصبرك فالشدايد وإعرف ان اللي صبر نالي = وأمر إبن آدمٍ لله ومايكتب له يصيبه
ولا تشكي سوى لله لامن الزمن مالي = ترى الشكوى لغير الله مذلّه واكبر مصيبه
وبوصي فإبن عمك لا خطا والصاحب الغالي = عليك بدمح زلتهـم وفعل الخير تحري به
تراهم محزمك فالضيـق لامن حدك اللالي = بعضهم لو تبي النجم المعلق فالسما يجيبه
وحق الجار بوصي به فلا تجزاه الإهمالي = ترى الممدوح من كمّل قصيـره في مواجيبه
وضيفك لا لفى يقلط على دله وفنجالي = وترى اللي ما يوفّي في حقـوق الضيف مالي به
ولا تسمع ردي النفس راعي القيل والقالي = ولا تامن ولو زين لسانه في اساليبه
ولا تهمل دروسك وإعرف إن المال زوّالي = وترى من غير علمٍ ما يزيـد المال تحسيبه
ولا تتبع هوى نفسك ولا تغريـك الأزوالي = ترى نفس الفتى تامر على روحه بتعذيبه
نصحتك طامعٍ لا قالوا اسمك ما يجي التالي = ابيك تكون الاول فالرجال وكلّن وطيبه
وصلاة الله عـدد ما هل وبل الخير همّالي = على الصادق محمد مرسله للناس يهديبه
وسلآمتك وعفاك
