قصيده للشاعــــــــــــر ....على بن سالم العتيبي
يا نفس صدّي عمد وأرقي من رفاع أليا رفاع =وانتي عزيزه مارضيتـي بالتدنـي والخضـوع
تجاهلي وأرقي على قمـة مراقيـب السبـاع =لو التذلل يشبع الانفس يمـوت الذيـب جـوع
مير المثل قال القناعـه كنـز والدنيـا متـاع =والمغريه لو تغري الطماع مـا تغـري قنـوع
وانا احمد الله يوم اسوق الرجل فالسبل الوساع =وأن سقتها قدام مايطري على بالـي رجـوع
اصدّ عن بعض المداخل عمـد قصـرٍ للنـزاع =من خوف لا تجذبني الزله وأنا رجـلٍ جـزوع
تجزعني الزله ليا جتني من لسـان الشجـاع =لو كنت اصم ابكم ليا صارت من لسان الدنوع
مانيب جاهل ميـر تحكمنـي تقاليـد وطبـاع =واشوف ناسٍ مايعرفون النزول مـن الطلـوع
من يطرد الدنيا محبة قـدر يبشـر بالضيـاع =واللي يعدّي فوق مايحسب,مصيـره للوقـوع
واللي يعبد وجيه خلق الله مثل عابـد سـواع =انا دخيلك ياعظيم الشان من بعـض الركـوع
يالله لاتظفي على وجهي مـن الغفلـه قنـاع =والهمني الطاعه ولا تجعـل جبينـي بالمنـوع
انا عليّ من الذنـوب السـود مـا لايستطـاع =تاخذني الغفـلات والانسـان مخلـوق هلـوع
غرقـان فاللـذات والايـام تطوينـي تـبـاع =على سفر واليوم يقرب من ربوع ليـا ربـوع
أسألك حسن الخاتمه يـارب لحظـات الـوداع =والعفو والغفران من شيٍّ ورى حدب الضلـوع
اناعـدوّ أبليـس والشيطـان معصـيٍ مطـاع =احيان يغويني على ذنبي واطيع النفس طـوع
وأذنب وانا من رهبة الموعد معاليقـي شبـاع =والخوف يدخل في شراييني على مليون نـوع
خوفي من اللي مقتفيني بعد ما يطوى الشراع =والصحف والميزان والانكال في يـومٍ يـروع
والعمر مهما طال حبل العمـر لا بـد أنقطـاع =وأليا ذكرت اللي مضالي كنه أقصر من سبوع
يارب زدني خـوف وأيمـان وتأمّـل واقتنـاع =ونور وهدايه منك وأسكنّي ملـذات الخشـوع
وزدني يقين ومتع اسماعي بحسـن الاستمـاع =يالله ولا تجعل عيونـي منـك تبخـل بالدمـوع
النفس أمّاره وانا والسوء في حرب وصـراع =والفاتنه تلعب على عيني مثل لعـب الفـروع
وسلامتــــــــــكم
