سلام ابو خالد وجوب ٍ ولازم = له التحية والولى حق نهديه
سلطان سلطان الوفا والمكارم = زعيمنا لا ما انوجد من يباهيه
عساف ٍ لعيس المصاعب وخازم = مهوّن القالات لا جات توجيه
عز الذي ضاقت به اقيود ظالم = ريف الضعيف اللي على الدوم يطريه
لا مد يمينه بالعطا سيل عايم = لين ارتوى منهو ظما الضيق حاديه
كن الرياح تسوق مده نعايم = ساقت سحب جود ٍ بها الخير تحييه
كن السما لجله تشيل الغمايم = تمطر من افضاله على الناس تسقيه
من ارتوى بطيبه هو اليوم غانم = شِرب الزلال اللي على الدوم يرويه
في رحمته كلن تهنّى ونايم = وبهيبته ما ينام منهو يعاديه
تهابه اوتاد السما له عزايم = وتهابه اعماق البحر من هقاويه
سـِيد المواقف لاقتضتها اللوازم = سـِيد الرخا واللين سِـيد المشاريه
الوالد لشعبه وهو خير حاكم = يا ربنا سلمه ويا رب تشفيه
صيتك يابوخالد وتود وقوايم = يا كيفه بشخصك عسى الرب يحميه
نسل المليك اللي به العز قايم = رز البيارق بالوطن من يجاريه
والعز بك يا القرم لا شك دايم = راع الوفا اللي هالبشر تفتخر فيه
عزمك شديد وبالشديدات حازم = لو ابتدى شر ٍ على الخير تنهيه
رايك سديد وكلمتك حد حاسم = والخير كله في مباديك نحريه
كن المفاخر في يدك لبس خاتم = كنّك تسوق الطيب للطيب تهديه
لك بالفخر اسمى سمات ومعالم = يللي بطيبك ترتكي له وتحويه
جعلك يابو خالد طهور ٍ وسالم = دربك رضا ربك عسى دوم تمشيه
عبدالله ابن مجحود