أبي لا من وصل صوتي يحس بضيقتي إنسان
أبي لا من نزف جرحي لقيت اللي يداويني
أبي شخصٍ يجي يمي ويقفل للعنا بيبان
أبيه يكون لي خلٍ وعلى حزني يواسيني
أبيه لمركبي مرسى وأبيه لغربتي أوطان
أبي لا من ذرفت الدمع لقيته لي يعزّيني
أنا ما ابيه يصبح ضلع أبيه يكون لي ضلعان
أبي لا من مشيت وطحت يحط يديه في يديني
إٍلامِن خانني التعبير أبيه يكون لي لسان
أبي لا من سكتّ ألقاه .. يفهم من نظر عيني
أبي لا من تعبت وضقت يلم الروح بالأحضان
أبيه يكون لي كتاب إذا ضاعت عناويني