=سلطان ابوديه
سلام الله عليكم يا محلفنـا مكرميـن الجـار=تحيه والتحيـه مـن غلاكـم جيـت اثنيهـا
على العهد القديم اللي مضا وانواصل المشوار=كذا عز القبيلـه يابـدر مـن عـز عانيهـا
=بدر العجمي
هلا يامرحبا ياهل الوفا والمرجله والكار=تراحيب الوفا لهل الوفا والمسك قافيهـا
على عهد الرجال الاوله مابه يمين يسار=علوم المرجله والعز (ف) اولها وتاليها
=سلطان ابوديه
يدوم ابك البقا والسلعه الاولى لها تجار=ما دام انك مجودها ترانا ما نخليهـا
الا يابدر مابين الرجا والياس والاسـوار=بعد عز الحياه اللي خذيته وانت راعيها
=بدر العجمي
ياسلطان الدلال الصفر تملاها النشاما بهار=مدام ان العرب عاداتها تـزرع مباديهـا
ليا شفت الغيوم مغيمـه تحـر للامطـار=وتلقى الحاجه الى بين بايعهـا وشاريهـا
=سلطان ابوديه
الا يالزير سالم كيف ذللك الزمان وجـار=تذكر ماضي ايام(ن) مضت وايجيك طاريها
نشوف الخيل قرح واتسابق داخل المضمار=ولكن الولايه ضايعه مـن عقـب واليهـا
=بدر العجمي
مابعد القوه الا الضعف هاذى حكمة الاقدار=ومن يحفر لخوه المسلم الحفره يقـع فيهـا
نبى حل القضيه مير نشب اللوح فالمسمار=ودرب اصحابنا فيه الحصاه الى تدربيهـا
=سلطان ابوديه
الا يا شيب عيني كل ما تشخص لك الأنظار=لشك الذنب ذنبك والسواه اللـي تسويهـا
تطول وحلها في عالم(ن) ثاني عليه ستار=ولا نقنع بتحليل القضيـه عنـد قاضيهـا
=بدر العجمي
ياسلطان انت يوم انك حكمة بقبضت الجبار=تباريك العـرب واليـوم ريـح ماتباريهـا
نشوف الى تشوفه والعلوم اطوال ولا اقصار=وكاد ان الدعاوى عند حاميهـا وحراميهـا
=سلطان ابوديه
بعد ذقت المراره هالزمان وبانت الاثـار=لو الحجه لها برهان منكرهـا ونافيهـا
لكن سلم على بحر الخليج وعاتب الانهار=ترا يمكن بعد بكـره تعنينـي واعنيهـا
=بدر العجمي
ابدرجها وحايلها ومهما صار مهما صـار=(وانا الى من قديم الوقت طابخها وشاويها)
مع بحر الخليج الى تقوله يبترم معصـار=طوانى الياس منه وربعكم كبرت علابيها
=سلطان ابوديه
تعبنا واجتهدنا كم نصحنا الثعلب المكار=كذا طبعه من اولها يكحلهـا ويعميهـا
ولا انت بعدنا راخص لكن الستر ياستار=نصافح كل يد(ن) مالنا حيله نقاويها
=بدر العجمي
ترا اسباب النصيحه ماتفيد الا مع الشطار=يعرفون الدروب وربها فالحـق هاديهـا
نهايت هرجنا وختامها فالعنبـر الفـوار=وصلى الله على محمد وهذا البيت ينهيها