هلا يا محمدبن سعيد وشلونك وكيف الحال=أنا جيتك وترى الدعوى مولعها مولعها
أنا جيتك ذبحني الهم والتنهيد والغربال=وآهات(ن) ملت صدري تبي منهو يونعها
أنا جيتك ياطيب راس وطيب جد وطيب خال=وبيبان الشكى لغيرك ترى مانيب اشرعها
عرفتك والليالي جزال وعرفتك والليالي هزال=وثبت لي إنك ذهب اصلي وسلومك ماتضيعها
فلا من قلت لك تكفى وترى تكفى تهز جبال=فلا تجمع لي كفوفك ولا تفرك أصابعها
أبيك تنهَض حجاجك وتصهل والرجال أفعال =وتقول ابشر بما تبغى ولو نبايعك سابعها
وأنا شفي ترى ماهوب حيازة حكم وإلا مال =ولكن دون رغباتي ظروفي من يسنعها
نبي المنهاج فوق إللي إلى منها هبطت زلزال=يشوق العين في المدرج تدرجها وتخشعها
نبي المنهاج للي له بقلبي مدهل ومنزال=هنوف(ن) ذابح روحي تغنجها وتدلعها
صباح الخير ياوجه الرضا ياغاية الآمال =ياابو رمش(ن) ذبح روحي وشرحها وقطعها
يا نادر وصف يا تحفة إلا أقول يا سلااااااال=يا مسهر عيني وعينك على نوحي مهجعها
يا طيف من النواظر زال ولكن في الخفا مازال =يشكل معضلة عسرة ولا به من يطوعها
غرير(ن) ليتني والله على صدره كما السلسال=وأحس بفايح وروده وإلا من صد . أطالعها
لا تنشدني هذي من هي ياناشدني بلا إستهبال=تراك تعرف منزلها ومشغلها وشارعها
وقبل شهرين في بيته قلطت وصب لك فنجال =ولكن نفسك القشرا عن الفنجال تمنعها
وتهيبني وتحذرني وتقول احذر ترى المحتال=إلا من حصل الفرصة حيالاته يقنعها
رجيتك خلني وياه جعله يحطني خلخال=ونفس(ن) تكره الواقع مع إحلامها دعها
هذا شفي ولكن عزتي لقلبي بغى ولا طال=وبيبان الرجى وقتي يقفلها ويشمعها
وبما إن الظروف الإقتصادية على ماقال =كبير(ن) شقها جدااااا إلى من جيت أرقعها
إلا مني جمعت ريال فأدر إني صرفت ريال =أجمعها وأضيعها .. وأضيعها وأجمعها
وإستناداً لما سبق ذكره فإن الأمر كله آل=إلى التأجيل لا الإلغاء إلين الله يوسعها
أنا جيتك وترى الدعوى سوالف ليل يا رجال =فلا من جيت اطفيها طلبتك لا تولعها