السلام عليكم ورحمة الله وبركاته

مسائكم معطر بشذى الورود النرجسية

الشوق ماله عمر , يفنى وينعاد = له في الضلوع أن عاد وأن غاب رجفه
مع كل فرقا , له ورى الجفن ميلاد=وأن ماتت الفرقا لقى الشوق حتفه
جيت أقتل الفرقا من بلاد لــ بلاد=ملّ الطريق يشيلني فوق كتفه
وأنا بعد مليت من كثر ما أرتاد=هالشارع اللي كان لك فيه شرفه
تظمأ عيوني شوفك , وتشبع سهاد=عيّا الزمن يقطع ظماها بــ رشفه
لاوجهك أسقاها , ولا ذاقت رقاد=ماغير طيفك , طيفك اللي أعرفه
كنّه ظبي , وعيوني ظلال صيـاد=يجفل قبل يرتد للجفن طرفه
مشكلته أنه كل ما أشتقت يزداد=حتى ملا جدران وقتي وسقفه
وأصبحت أشوفه فــ أول الغيم لاجاد=وفــ أقصى الشفق لاطاحت الشمس خلفه
وفـي الأرض لانامت عقب صوت رعاد=وفي كل شباك ٍ صحت منه درفه
أتعبت طيفك لوم , واللوم مافاد=ويوم الأمل في شوفتك مات نصفه
نويت أسافر عنك بجروح ٍ جداد=وعمر ٍ من أوراق الزمن حان قطفه
نويت , لكن جابني الشوق منقاد=وجابك حنينك , والزمن سال عطفه
شفتك تبــسّـم لي خجل مدري عناد=وفي نظرتك شوق ٍ من الظلم وصفه
حسيت كني طفل , وعيونك أعياد=ياعيدي اللي له ورى الصدر رجفه
سـمّ اللقا صدفة , وأسـمّيه ميعاد=أنا أنتظرتك , وأنت مريت صدفه