ياصاحبي للناس شرع ودستور=وكلا ترى يتبع قوانين دستوره
أحدٍ رضى يمسك مع الناس طابور=وأحد مكانه ثابتٍ راس طابوره
وأحد مشى من جملة الناس مجبور=وأحدٍ لطيبه جملة الناس مجبوره
وأحدٍ قضى ليله من الهم مقهور=وأحدٍ تبات إعداه بالهم مقهوره
يموت ابووجهين في شاهد الزور=اللي يطابق له على رنجه وزوره
اللي ليا شاف الخطا قال معذور=والعين وإن تزنيبها قال معذوره
يغط حقٍ عن هل الحق مستور=وعين الولي تكشف على كل مستوره
البارحة مابين سالي ومخطور=سلاّني الهوجاس والنفس مخطوره
لاني بحيّ حيّ وأحتاج دكتور=ولا صويبٍ عالجه طب دكتوره
اشوف ذا الدنيا تصاريف ودهور=عزي لمن هو خاصم الوقت ودهوره
بتلوف به بقعا مع كل مطيور=ونفسه من الصكّات بتروح مطيوره
تسري به أحلامه مع أحلام طاغور=لا حصّل أحلامه ولا صاد طاغوره
ياصاحبي وان كان تبغى معي شور=فاترك جليسٍ لانفع علمه وشوره
وانصى عريب الجد والساس معمور= اللي مجالسهم على الدوم معموره
بمكيّلات البن رسلانه تفور =تشرب دقاقه هيلها منّه تفوره
اللي مخوتهم بساتين وزهور=تقطف من أطيبها ليا فاحت زهوره
أرسلتها صوبك ولا فيه محذور=الله يجنبنا خزى كل محذوره
نظمتها ماني لها عبد مامور=لكن طاعت لي ولا هيب ماموره
رشيتها قطرات من سبعة بحور=والقلزمي من غبته جادت بحوره

المشاركة الأصلية كتبت بواسطة مترك العمره (المشاركة 1211375) الشاعر القدير/ صالح الغباري يامرحبا ومسهلا تسلم على هذه الرائعه .. جزله ومضمونها يلامس واقعنا الحالي... اصبت في حبكها وفحواها صح الله السانك ... لاعدمناك تحياتي لك وتقديري

المشاركة الأصلية كتبت بواسطة king الوادي king (المشاركة 1211448) الله الله صح لسانك ولاهنت وجعلك تسلم على كل حال

المشاركة الأصلية كتبت بواسطة فيصل المشلش (المشاركة 1213329) صح لسانك ولاهنت وجعلك تسلم