قالها ابن الذيب من هاجوس باله = كلمةٍ يلعب بها والبال زيني
قالها يومه طرى له ماطرى له = من هواجيسٍ تشيب المرضعيني
غرني بعض الرجال بكثر ماله = ما درى إن الموت في حبل الوتيني؟
كيف ينفعني وبعض الناس خاله = ما يقوم البيت دام الساس طيني
ماش وين اللي عوايده الشكالة؟ = مثل ابن ظافر حمد ليته يجيني
الثناء والجود دايم في خياله = علّمه ظافر سلوم الطيبيني
جوّد العليا ولزّمها عياله = وأدركوا من علمته دنيا وديني
واهني من باع حظه وأشترى له = سار في درب النبي وأخزى اللعيني
موقفه ما كل رجالٍ يناله = من بغى ممشاه يقعد مرتيني
وكم ذبح من حايلٍ من حر ماله = عادته لطمة خشوم العايليني
حالفٍ ما آخذ على الطرقي رياله = وبالثلاث محرّم إنها ما تجيني
لا لقيت اللي على السكة لحاله = يلتفت ويقول وين المستحيني؟؟
أوقف الموتر حيا وأبغى الجمالة = يوم ولد اللاش وجهه ما يليني
والطمع في كروة الرجلي رذالة = خص به وإن جاء مجال الغانميني
والردي في حالةٍ ما هي بحالة = يا عوينه من كلام الطيبيني
الولد وإن طاب قالوا من خواله = بالخوال يسأل قبل الوالديني
وأركبه لعيون من زينٍ دلاله = ما تحاكوا في قفاه الرامسيني
ما بغى غيري وأنا ما أبغى بداله = قاعد لي في الرجاء مدة سنيني
ما قعدنا في العمل نبغى الرزالة = ناخذ العليا طريق الفايزيني
وأشرب الفنجال وأكب البياله = تابع سلمي سلوم الأوليني