قال المثايـل وابتـدى نظَّامـه=يقدح سنا فكره يشب إلهامـه
شاعر يجيب من المثايل حـوره=إليا بغاها جت ببيض احرامـه
جزايل الفكـره سمـان المعنـى=يطرب له اللي يسمعه بأنغامـه
شواردٍ عـزِّل تبيـد القانـص=ومثلي يسدد بالقلوب سهامـه
جواهـرٍ مابيـن در ولـولـو=أبدعت في ترتيبهـا وإنظامـه
وأنا احمد الله شاعـرٍ متمـرس=تشهد لي الشعَّار عند أحكامـه
مسلم سعودي والقبيلـة شمَّـر=قمة سنام المجـد حـي أسنامـه
عندي ولاء وسيـدي عبـدالله=الليث أبو متعب فخر حكَّامـه
مابين أبو تركي وبين العاصـي=ياحـي والله خولتـه وأعمامـه
سمعاً وطاعه يابو خالد وأبشـر=حنا نكال المعتـدي وإجرامـه
يالنايب الثاني وكـل الأسـرة=حنا لديـن الله بكـم خدَّامـه
في دار حايل دار طـي وحاتـم=في مستقر الجود راس أعلامـه
في دار أبو فيصل سعود الوافـي=وعبدالعزيـزٍ نايبـه وحزامـه
أبمدح اللي مدحهـم يزهانـي=وأرفع على صدري عزيز وسامه
سلام يا أهل الفعل وأهل الطوله=سلام ماتبقـى الليـال ودامـه
سلام منـي والسـلام معمـم=تسليمـةٍ بسلومهـا وإسلامـه
سلام ماتنشي مـزون وتمشـي=مثل الجبال ليا ارتكـم ركَّامـه
يكشف سنا برقه حنادس ليلـه=ترجف رعوده مثل يوم قيامـه
سلام ما انهلت وهلهـل وبلـه=ولامن تكسَّر وانهشم هشَّامـه
سلام مايمـلا المسايـل سيلـه=وما يجرح خدود الثرى ومرسامه
سلام ما تزهر وتخضـر بيـده=وما هزت غصونه نسايم شامـه
سلام ما غنى الحمـام النايـح=وما تطرب لحونه قلوبٍ هامـه
سـلام مانجـمٍ تبلقـع لامـع=به يهتدي منهو سرى باظلامـه
سلام ماشعَّت وشعشـع نـوره=شمس الضحى وماتنبلج بسَّامـه
سلام عـد بحورهـا وأمواجـه=وما غاص فـي غبَّاتهـا عوَّامـه
وأعداد ياقوته عـدد مرجانـه=سلام يـا همدانهـا يـا يامـه
سلام عد خطاكم اللـي جتنـا=وعد الثرى واللي وطى بأقدامه
سلام عد الـدم لامـن فـوَّر=بعروقكم ودما الكرامـه زامـه
سلام يا رجالٍ تجيـب النخـوة=للي نخاهم يوم حـل إعدامـه
صيَّح بعال الصوت فزعه..فزعه=وقفة عروبه..واضربوا دمَّامـه
اليامي إن وقَّف وقف همدانـي=عند السجين اللي يعـد أيامـه
لبَّوا نداه وجلجلت صيحتهـم=وكلٍ على راسه يشـدَّ عمامـه
قلتوا سمعنا الصوت جينا جينـا=للـدم حنـا والله الغـرَّامـه
الزامـل يغنَّـى وكـلٍ هـلاَّ=وبيض الجنابي يرفعه ضرغامـه
من دار نجـرانٍ لديـرة حايـل=هذي طوابيره نشوف زحامـه
من دار نجـرانٍ لديـرة حايـل=موجٍ تدفَّـق بالبشـر دوَّامـه
من عصر أبو ليلى المهلهل سالـم=ماقبـل هالوقفـة ولا قدَّامـه
والله..والله مايسطَّـر مثـلـه=تاريخنا لو وش تطـول أيامـه
يا يام يا همدان عشتوا..عشتوا=دمتوا..سلمتوا..رافعين الهامـه
أنتم هل الطولات وأهل العليـا=قامة شرفكـم ماتطولـه قامـه
كل المراجل في يديكـم كلـه=طاوع رسنها ماتشـد خطامـه
أنتم هل المـده وأهـل الهـده=أنتم مشاعل هالزمـن وكرامـه
حاتم هنا..والكل منكـم حاتـم=الطيب فيكم طاهرات أكمامـه
أنتم هل السيف الرهيف وحدَّه=اللي يشل الروح قبل عظامـه
أنتم هل البيرق ورمـحٍ يطعـن=الكل منكـم باللقـا مقدامـه
وأنتم هل البندق سباع الخندق=ياويل ناوي حربكـم بأوهامـه
تمطر سماه النار وأرضه زلـزل=كن القيامه من غضبكـم قامـه
لكم مهابه في قلـوب عداكـم=تهابكم حتى النطـف بأرحامـه
عيونكم حمَّر وفـوق الضمَّـر=مساعر الهيجا بوسـط اجهامـه
إن ثارت ودارت رحى وقعتهم=تطحن بحومات الوغى ظلامـه
أنتم سباعٍ ضاريـات جموعـه=تدمي ضحى الهيجا نحور أخصامه
وأنتم صقـور حايمـات بجـوه=ياويل من هدت عليـه وحامـه
يامتعبين الوصف كلـه يقصـر=منهو حكى وألا كتب بأقلامـه
أنتم فرات المجد وأنتـم دجلـه=مثل البحور أمواجهـا لطّامـه
يا جا نهارٍ بـه يشيـن الخاطـر=يا طشت العذرا سـواد لثامـه
تنقض جدايلها فخـر وتزغـرد=صبيان يـام عيونهـا ووشامـه
جيتوا فوارس مسرجاتٍ وصفه=كنِّه شياهيـنٍ تـلاوي لجامـه
جيتوا كتايب والحرايب تقـدح=وسيوفكم ما تنغمـد بأثلامـه
صغيركم يولد محنَّـك ضـاري=وشلون شيَّابه وهـذا غلامـه
محزم وجنبيَّـه ورايٍ صايـب=وفهمٍ موازينه يطيـش أفهامـه
لأنه ولد مابيـن أبـوه وخالـه=أسد..أسد ماهو بولـد خمامـه
يا يام يا همدان عنـدي كلمـة=أنتم بدا كل الفخـر وختامـه
باسمي وعن نفسي وكلَّ ربوعي=نرفع لكم بيضا بروس أرجامـه

حياك الله وشكرا على المرور