ياصاحبي علتي بالجوف مخفيها=والوقت كنه على همي يناديني
أدري بيوتي تغرك في معانيها=لكن أبعطيك نبذه من عناويني
بشرح بعضها وسميها بساميها=ثم أبتعد لا لقيت القلب ناصيني
هات القلم وأنتبه لا قمت أغنيها=العمر روح وفعل الناس كاويني
أشوف ناسٍ ولا ودي أحاكيها= لأن الصراحه تزعلهم وترضيني
ناسٍ سياساتها في ضيم غاليها=وناسٍ سياساتها قلب الموازيني
وناسٍ تصلي لجل عينٍ تراضيها=ونياتها عكس نيات المصليني
وناسٍ تسوم الذمم بالمال تغريها=يوم الحشر وش تسوي بالملاييني
ما تدري إن الذمم في حكم واليها=وحكامها واضحه بالشرع والديني
كمٍ رخومٍ كثير المال يطغيها=تنسى رجال الأشده والسلاطيني
أدخل على الله من الدنيا وشاريها=ودخل على الله من أعيال الشياطيني
النار ما تحرق إلا رجل واطيها=شطرٍ حفظته وطبقته من إسنيني
يا قلب خل البشر لا عاد تطريها=وخذ العلوم الأكيده من شراييني
الذيب لا ضاق نفسه ما يماليها=والطير لا شك يكفخ بالجناحيني
البل لما صدرت تقفي براعيها=ولا الغنم تتبعه من حين لا حيني
أصايل الخيل تعرف من مواريها=وتعب على كسبها لو شحت إيديني
واللي نسى وقفتي ماني مثنيها=تكفيني الأوله منه وتغنيني
يا قلب جاتك علومي وحتفظ فيها=لا عاد تنشد زماني وش يبكيني
الشجره اللي عطتني الشوك بسقيها=يمكن مع الوقت تثمر وقضي الديني
يا صاحبي وش تبي... خلاص بنهيها=دام الصراحه تزعلهم وترضيني