كيثر اللي يلوموني وقالوا بطيبتي تبذير=وأنا والله ما فكرت لطيبي غير يذكرونه
أنا من خانت النظره عيونه وأبدع التصوير=حسبته مثلي عاشقني مثل ما كنت مفتونه
أنا من خانت الكلمه لسانه وخانه التعبير=نطقت وقلت يا خلي قبل لاعرف مكنونه
خيالي حطم آآمالي وأخطا حيل بالتقدير=تصورته شجر واقف وأنا وراقه على غصونه
تخيلت السما صدره يحلق في فضاها الطير=وصرت أحلم أنا طيره وهايم في سما كونه
تهيالي مثل شمعه ينور دنيتي تنوير=أثاري حلمي الدامي عشق له أرض ملعونه
أبد لا ما توقعته يخون الظن والتفكير=خدعني لين أنا صدقت غلاي أغلى من عيونه
عذرته والعذر مله وتعذر خاطري التبرير=أحاول أكتم أحزاني وجرحي يفضح طعونه
عجزت أحصيله زلاته وعجزت ألقالها تفسير=أسامح وأدمح الزله ويطعن قلبي ويخونه
أنا صبري كره حلمي وكره أسلوبي بالتخدير=تمرد ما بقى فيني وحطم صبري حصونه
أنا رجال لامني عشقت أخلص وقلبي يغير=أحب العشق يفهمني ومثل ما يصوني أصونه
أبي تسمعني يا غافي وهرجي نبرته لك غير=أبي تاخذ من أشعاري حروف أبيات موزونه
تراني من عرب ذلوا يجيهم شك أو تقصير=بنوا بالعز رايتهم و رب العرش يعرفونه
تراني من عرب وفوا بحق الضيف وحق الجير=مشرع كل بيبانه قبل ضيفانه ينصونه
أنا يا خلي لامني كرهتك مدري وش بيصير=أخاف يثور بركاني و فجر نفس مغبونه
أنا يا خلي لامني بديت الشر قبل الخير=حرام أني لسويبك سوات الحرب مطحونه
عزيز النفس ما يرضى مهونة نفسه بالتحقير=ولا يحسب لها الفرقى لو تحده على جنونه

المشاركة الأصلية كتبت بواسطة راكان اليامي الله عليك يابن عمي وعيني عليك بارده اتوقع لك مستقبل رائع شعري والله يوفقك وصح لسانك

المشاركة الأصلية كتبت بواسطة العوووود صح اللسانك ملااااااايييييييييييييييين ولاتكفي قصيده جزله والزين مايجيب الا الزين

المشاركة الأصلية كتبت بواسطة شموخ العز عزيز النفس ما يرضى مهونة نفسه بالتحقير ولا يحسب لها الفرقى لو تحده علـى جنونـه الله عليـــــــــــك أبدعت تسلم يمينك ... ويسعدني انتظار جديدك شموخ العز