ياللي طرقت الخفوق تجـدد طعونـك=خل المعذب يداوي جرحـه الدامـي
كم لي وأنا دالهٍ في محجر عيونـك=وأبكي على ما مضى من ماضي أيامـي
من طول هجرك تعافى العظم من دونك=أرجوك لا عاد تزرع فينـي أوهامـي
خلني أداري جروحي وأتبع ظعونـك=وأعيش في رحلة العشـاق بأحلامـي
يا عد ياللي ضماة العشـق يردونـك=راح العمر وارد وصادر وأنا ظامـي
عجزت أناجي ضنوني تسمع ظنونـك=لكن خسارة هقاوي راحت قسامـي
لا من سمعت اسم باسمك قلت يدعونك=يفز قلبـي وعينـي دمعهـا جمامـي
أنبح صوتي وأنـا لبيـك يا عونـك=ومن كثر ما العي عليك الجفن ما نامي
ظلمت حبٍ تهشم وسط مكنونـك=لا تظلم الحب أنا ما أرضـاك ظلامـي
مخزون حبك توفـى عنـد مجنونـك=مدفون بين الضلوع وقبـره اهدامـي
ليتك حضرت لوفاته يـوم يدعونـك=كانك تعزي على قبره مـن العامـي
رجواي فيك انتهـت لا لا يردونـك=وشلون يرجع وحبك مات منظامـي
وصية الحب إلـى جاتـك يودونـك=لـساحل فراق تبقى فيـه ما دامـي
وهناك تلقى معـك منهـم يغرونـك=وتموت من حسرتك وتعض لابهامـي
من خان لأجلك حبيبـي لازم يخونـك=ومن هو حكى لك عليك يصير نمامـي
هذا المعذب يوادع آخـر طعونـك=يشكي إلى الله ظلم وينكس أعلامـي