الفاتن اللي سببت غربالي=يالعنبوها .. ياقشر دبرتها
المترفة .. بنت الشرف والمالي=تفلس (ذوي الأموال) من بذختها
ماحسّبت بالمنشغل والخالي=وماتلتفت في الناس من طنختها
ومافكرت في اللي مقامه عالي=وكل ّ (البني) يمشن على موضتها
ماهمّها الا (العقد والخلخالي=وفستانها .. والميك .. ومرايتها)
ولو مرّها الاول يقود التالي=مافيهن اللي حرّكت غيرتها
لو وقّفت بين الهوى (وهبالي)=ماكان هوجست بدفا ضمتها
ولو حولها موالي .. وغير موالي=لا ماسهرت اشفق على طلتها
في ذمتي لا من طرت في بالي=((ماتهتك عيوني ستر دمعتها ...
لكن / اعاني من سبب اهمالي=وارحم عيوني من لظى جمرتها))
واقول : ياعيني تراه اشوالي=والظلم فيني من سبب صدّتها
وش حيلتي في مهجتي واحوالي=لاصارت اوجاعي على حالتها
مع ان مالي في العليا والي=بس اعسف اشغالي على جرتها
من مكتبي (للمملكة) طوّالي=امضبّط اوقاتي على ساعتها
واليا لمحت اسيابها تختالي=دريت بان الفاتنة مرّتها
اجلس وادندن بالعنا موّالي=حتى (العمالة) تحتري حزّتها
وليا اقبلت .. ياحيلة المحتالي=حتى الشوارع تحترم هيبتها
وامشي وراها والسعد يبرالي=الين اوصّلها إلى فلتها
واقول في نفسي : (اواعزالي=ياسعد منهو غرفته .. غرفتها)
ولامن رجعت لشقتي بلحالي=مخنوق من وقتي .. ومن قسوتها
اشره من الضيقة على جوالي=اللي ملفّاته بلا صورتها
ياخالد .. افزع لي وشخّص حالي=هذا وانا ماذقت من لذّتها
ياجعلني فدوة ثراها الغالي=وياجعلني مااعدم شفق شفّتها
الشامخة بنت الشرف والمالي=ياشين مع (سواقها) (دبرتها)

وسلامة قلوبكم




..