بسم الله الرحمن الرحيم

اصبّح وامسّي على الجميع بخير
واعتذر على الانقطاع للانشغال والله يكفينا شر الدنيا
وهذي القصيده موجهه للربع اللي قنصوا شمال صارلهم يومين
ومعهم من الطيور 3
مسمار , ورّاد . بارود
والقصيده موجه لكل واحد فيهم
والله يرزقهم...

اقول فيها

وش حيلة المحروم لاتضايق؟ = محترقةٍ كبده على خلاّنه
لا صار حظّه طايح ومتعومس = ماغير يشرب من قليب احزانه
ودّه على المخراج غير مابه = كفوٍ يعدّه من مقام اخوانه
كفوٍ يحس وضيقتي يدراها = سمٍ على الواشي على عدوانه
ياليت عندي بالرصيد اجازه = ولاّ مدير مقدرٍ صدقانه
المشكله بعض العرب بلاّسه = اعقولهم وقلوبهم تعبانه
اهلا وسهلا يالله تحييهم = اهل السفينه نايب وربّانه
اهل الدروب الكايده مناعير = الصدق ساسٍ والوفا بنيانه
يستر عليكم ربي ويرعاكم = الواحد الليّ حطنا من شانه
الخالق المعبود كامل وجهه = الرزق عنده لاعطا سبحانه
أرسل على (مسمار) خير مرسول = بلّغ سلامي له واحب اعيانه
النادر الوافي كريم سبلا = مشبعٍ راعيه مع ضيفانه
ولاّ ترا (بارود) مانسيناه = ياقرب لون الليل من جنحانه
بيض الدواغر لاغرف؟ تسوحل = عوق الحباري ثابتٍ نيشانه
وميّل على (ورّاد) طير شلوا = يازين طبعه رزّته فنّانه
واليا طلب له صيدةٍ علّقها = صفّا حسابه وانهزم ديّانه
ياقاري المكتوب كيف جوّك؟ = ارسل لي التقرير مع بيانه
ابغي اسلّي خاطري واغني = واجر طاروقٍ جديد الحانه
العمر فايت والزمن ماقصّر = مثل الرحا بحبوبها طحّانه
امانتي تحيّتي وصّلها = نفسي عليهم شفقةٍ ولهانه
صبّح على الاجواد كلٍ باسمه = لحدٍ يسج ويخلف الامانه
استودعك بالله في قصيده = قصيدةٍ بعلومكم طربانه
واختامها عمبر ومسك وكادي = واختام عمري جعلها بجنانه
صلاة ربي عد ماهل هلال = ولاّ عدد ديمومةٍ رويانه
على النبي اشرف خلق ربّي = شفيعنا من غاوي وشيطانه

وسامحونا على القصور
فمان الله

المشاركة الأصلية كتبت بواسطة الغروب (المشاركة 802114) سرحان الفكر قصيدة جزله وابيات معبرة تقبل الشكر والتقدير .