مدري ( تفو ) هي مدح ولاّ شتيمـة !!!
 

بسم الله الرحمن الرحيم

السلام عليكم ورحمة الله وبركاته


وبعد غياب طويل اهدلكم القصيده هذي ,,,,


البارحة جاني مـن الحـب مرسـال

من عقب ما بينـي وبينـه خصيمـة


وانا ترى في الحـب مانيـب فعّـال

ولا بعـد ولّـع بقلبـي هشيـمـه



ولا بعد غنّيت فـي ساعـة وصـال

ولا بعد ذقـت الفـراق وجحيمـه



ولا جرى دمعي على الخـد همّـال

ولابعـد جربـت مــرّ الهزيـمـة



حتى وردنـي تالـي الليـل جـوال

وانا على شاهي وبسكـوت ديمـة



الرقم بايخ لكـن الصـوت قتـال

كنه مثل صـوت المذيعـة حليمـة



قالت مساء الخير يـا طيّـب الفـال

قلـت ارحبـي ترحيبـةٍ مستديمـة



بالعود والصفـري ودلـة وفنجـال

واجبك يا بنت الأصـول الكريمـة



ردت بضحكة ثم قالت وش الحـال؟

قلت اشهد إن الحال عقبك سقيمـة



قالت وهي تضحك بعد مثل الأطفال

وانـا بعـد كنـي بدونـك يتيمـة



من يـوم قالتهـا تزلزلـت زلـزال

من فجعتي كنـي مسـوي جريمـة



قلت ارفعي صوتك ترى مابه ارسال

كـذاب لكـنّ المصيبـة عظيمـة



قالت أقول اسمع ترى هرجنـا طـال

ممكـن تصاحبنـي ترانـي وسيمـة



واسمي الحقيقي أول حروفـه الـدال

لكـن يسمّونـي البنـات الزعيمـة



صحيح أحب الفخفخة واعشق المال

لكـن ترانـي طاهـرة مستقيـمـة



ما عندي امغازل ولا (لعب يهّــال)

ما عندي إلا في الشرف والحشيمـة



بس الصراحة قلبي لشوفتـك مـال

واصبحت وحدك جالسٍ في صميمه



فكّر بعقلك واترك القيـل والقـال

واحذر تطيع اهل العقـول العقيمـة



وارسل علي الحين خمسميـة ريـال

أشحن بهـا جـوال أختـي غنيمـة



أو طقم غالي فيه خاتـم وسلسـال

أروح به فـي عـرس ولاّ عزيمـة



قلت الحقيقة مانيب رجـل أعمـال

ولانـي بتاجـر والمـوارد عديـمـة



أنا الصراحة شبـه عطّـال بطّـال

وعلاقتـي بالفقـر جـداً حميـمـة



والراتب الله يرحم الحـال مـا زال

محـدود والمصـروف ربـي عليمـه



والدين بـالآلاف والبنـك شغّـال

ياكـل فلوسـي بالربـا والظليمـة



والسوق طايح والغلا ضيّـق البـال

والموت والله صايـر اكبـر غنيمـة



قالت تحمّل بـس والحمـل ينشـال

خلك شديد الباس صلـب العزيمـة



ياخي تصرّف جعلك اتصيـر نشّـال

أهـم شـي إن النوايـا سليـمـة



لابد تفهمني علـى كـل الأحـوال

ما دمت من أهل العقـول الفهيمـة



قلت إيه والله فاهم اللي على البـال

لكن تـرى هـذي علينـا قديمـة



يا بنت هـذا صايـر اليـوم مـوال

للي تبي تلعب علـى ابـن اللئيمـة



يا بنت ما تدرين كـم فيـه محتـال

يلعب على الحبلين وانتـي غشيمـة



يا بنت كم من جاهلة دمعها سـال

من عقب ما جات العواقب وخيمـة



والبنت لا اقفى عرضها بيد الأنـذال

والله مـا يبقـى لهـا أي قيـمـة



قالت تبي ولاّ فخلّك علـى جـال

مهوب ناقصـني نصايـح حكيمـة



عز الله إنك للأسف منـت رجّـال

وانك قليل الذوق ما فيـك شيمـة



يا لعنبو اللي مـا يسطّـرك بنعـال

حتـى يعلمـك الغـزل يـا بهيمـة



( تفو ) عليك وصكّت الخط في الحال

مدري ( تفو ) هي مدح ولاّ شتيمـة D:

رد: مدري ( تفو ) هي مدح ولاّ شتيمـة !!!
 

رد: مدري ( تفو ) هي مدح ولاّ شتيمـة !!!
 

صح لسااااااااااان شاعرهاا

ولا هانت يمناااك


قصيدة في قمة الابدااع

تقبل مروري المتواضع
في متصفحك الغالي

رد: مدري ( تفو ) هي مدح ولاّ شتيمـة !!!
 

.

.

تــســلــم يــمــنــآك طــآل عــمــركـ

عــلــى الــمــشــآركـــه الــمــمـــيــزه

تـــقــبــل مــروري

.

.

رد: مدري ( تفو ) هي مدح ولاّ شتيمـة !!!
 

لا ابشرك شتيمه وتكرم منها :)

صح لسانك ولاهنت


تقبل مروري ..

رد: مدري ( تفو ) هي مدح ولاّ شتيمـة !!!
 

الا والله شتيمه:)

صح لسانك متعتنا الله يمتعك

رد: مدري ( تفو ) هي مدح ولاّ شتيمـة !!!
 

رد: مدري ( تفو ) هي مدح ولاّ شتيمـة !!!
 

جميل

رد: مدري ( تفو ) هي مدح ولاّ شتيمـة !!!
 

لا لا الا مدح بس غلطانه كانت بتقول كفووووو بس قالت تفوووووانا اقولك كفووووو وصح الله لسانكD:

رد: مدري ( تفو ) هي مدح ولاّ شتيمـة !!!
 

القلوب عند بعضها ياذيب ولاهنت علي المرور