جاني خبر محزن ولا هو على البال = كل الروادي يا جماعه تذيعه
قالوا توفى طيب الصيت والفال = فجيعه يا كبرها من فجيعه
نبكي على فرقاك يا شيخ الابطال = وانشهد ان النفس عقبك وجيعه
وتبكي على فرقاك لباسه الشال = وتبكي على فرقاك بنت رضيعه
ويبكي بعد معهم صناديد وارجال = لو البكى ما هو لهم من طبيعه
الدمع من بعده على الخد همال = وضاقت بعيني هالفجوج الوسيعه
ولا طاب لي كيف ولا طاب فنجال = لأن الليالي عقب موته مريعه
لا مزنه عقبه ولا عاد همال = وصيف الحياه اقبل و ولاَ ربيعه
شيخ الكرم تضرب به أمثال وأمثال = لأن العطا والجود عنده طبيعه
وتحققت في عهده احلام وامال = وصوره كويت العز صارت بديعه
تفخر بها اجيال ومن بعدها اجيال = وصارت بفضله منزلتنا رفيعه
في ظل جابر عاشت اجناس واشكال = بوذي وهندوسي وسنه وشيعه
عاشوا بأمن وخير وبعز وظلال = ولا نامت العربان عطشى جويعه
وصى على الجيران في كل الاحوال = وحنا لهم مثل الحصون المنيعه
داس الخطر صامل ولا هاب الاهوال = ولا هاب صوت الذيب في راس ريعه
ولا هاب من رجلي ولا هاب خيال = وياكم رجال منه خرت صريعه
وليا نوانا الغير في حرب وقتال = يأشر وحنا له جنود مطيعه
ما نحسب حساب للأنفس وللأموال = والرجل للميدان عجله سريعه
حنا ترانا للعدا سم قتال = والسيف وقت الحرب يلمع لميعه
وعدونا ماله سوى فال وعقال = اما اندحر ولا وفاه شنيعه
من قال جابر شخينا مات من قال = محفوظ عند اللي يحفظ الوديعه
انشهد ان جابر ترى حي لا زال = واسمه يرفرف دايم في الطليعه
قال المثل مامات من خلف عيال = وعيال جابر مثل ابوهم شجيعه
راح الأسد لكن بقى بعده أشبال = وتمشي على السنه وحسب الشريعه
مرحوم يانسل الحلاحيل الابطال = وانا اشهد ان النفس عقبك وجيعه
ومن لا بكاك اليوم ماهو برجال = وجعله يموت الصبح ولا تبيعه