يا والله اللي طوّلت ضيقة البال =و النفس للراحات مكثر حوجها
تمرسلت بهمومها و التغربال=سود الليالي سمّ حالي عوجها
ألى ذكرت عصور وقت ٍ لنا زال=ذكراه نفسي ضرّها ما بهجها
أونست نار ٍ فالحشا تشعل إشعال=يا الله هوّنها و برّد وهجها
و أدوي و فكري للهواجيس منزال=الناس عندي : غير ما أسمع لججها
رحمتك يا اللي للصعيبات حلاّل=أنا لغيرك علّتي ما أهرجها
اللي لا ضاقت و ميزانها مال=عليك يا ربّ الخلايق فرجها
يا ظامن الدنيا ترا مالها حال=لابدّ من يوم ٍ تضيـّـق فججها
النفس من ما صابها شفت الأهوال=ما فيه يوم ٍ همـّـها ما سهجها
و أنا معاديها على الصبر لو طال=و إن شفتها ملّت و كثرت حججها
ألزمتها .. و أجبرتها .. بالتحِمـّـال=آموت صبر ولا تبيـّـن حرجها