ترى سياسة حوحو مثل سياسة قيص قيص=لكن مكافي اللي غاياته بررت وسايله
مابه يتيم الا اللذي ماله ولد عم خليص=ينوب عنه بالدهر وان ثقل حمله شايله
لأن السنين المقبله عويات ذيب ونبح نيص=والا الابوه والامومه مرحلات زايله
هيص ياقلبي في بساتين (الفلا) وانا بهيص=والفرصه العاديه تغطي عليها الهايله
والا (كولومبس)من ردى حظه ماجا شرقي خريص=كان اكتشف صخور الارض الصلبه من السايله
مراتع اللي مالك قلبي وله جرح غويص=يجتاحني بين الضلوع العوج وانا شايله
تعال يا اعذب من قصيد ابن غراب البن رميص=يامسبب هدرة بعير القلب ورغا حايله
يا أمتع من علوم القنص عقب البطا في اذن القنيص=وارق من وبل السحاب الا انتثر في القايله
ياروعة الشعر افـ غراميات (سعد بن حريص)=بأسمعك بيت مهستر بي وانا اللي قايله
خليتني دمعه على خد الزمن فيها بصيص=من المآسي والكوارث والحروب الطايله
وانا حريص اني ما افرط فيك ولاني ابحريص=تبلشني بقلب يحايلني صبر واحايله
يامخترع (سياسة التهجير)والحب الرخيص=يامقشرة هالعشق وآه منه ومن عمايله
أصيح صيحات النذير وأون ونات القريص=وأيلا قدح برقك ورا حد السحاب اخايله
غير الغدر يوم اصلب عظامي وانا حالي نقيص=الهجن تقطع بيدها واكوارها متمايله
محّصت قلبي بالغلا وانته نتاج من المحيص=راعي الجميل يموت ماتنسى العرب جمايله
من كثر ماتملك خصوصيه بقلبي يالخصيص=ماباقي الا أسجل أسمك وسط كرت العايله

وســـــــــــــــــــــــلامتكـــــــــــــــــم