وجودي وجود اللي تراكم عليه الدين = حدوه المقرّد لين حرّج على بيته
يبي طرحت ديونن تعدّت على الميتين = ولا وفّت البيعه وكمّل بوانيته
وقالوا تشيل أغراض بيتك قبل يومين = تباكو وراعينه وكثرت تناهيته
على اللي حياتي دونها ما سوت قرشين = تباطا القصيد ويحسبنّي تناسيته

وجودي وجود اللي حلاله غدا بالموج = طبع محمله وأقفا على لوح شلمانه
تقبض بلوحه وأزرق اليم ساجه سوج = تذكّر عجوزه وأخزنه صغر غلمانه
على واحدن كل المداخيل دونه عوج = ظلمه الزمان ولا أتجرّا بظلمانه

وجودي وجود اللي حبيسن ورا الشباك = تذارف دموعه كل ما شاف شيبانه
عليه الحكم صادر بمرسوم من "ذولاك" = ترقّب قصاصه والوساطات تعبانه
على واحدن لامر صاب الضمير ارباك = أسلّم عليه ويستمع ورع جيرانه

وجودي وجود اللي على أوّل مفز صباه = يتيمن وإخيه ملاحظن كل ماجوبه
وقف عند لمّة حادثن ما درا بأقصاه = تفكّر وإلى سيارة إخيه مقلوبه
كشف منّه لحافه وصوّت ولاحاكاه = درا إنّه توفّا وإعتزا ثم مزع ثوبه
وجودي وجوده والحشا فيه ما كفّاه = على واحدن شدّو عربهم وقفوبه

وجودي وجود اللي طمع والطمع منحوس = تراكم عليه الدين قرضن وسيّاره
دفع في "هبتكو " كل ما جمّع من فلوس = على نيّته والناس تنصب وعيّاره
خذا عقدن مزوّر والعبو عليه هيوس = غدا المصري بحقّه وهو يطرد أخباره
عقب ما أعلنو الاقلاس كثرت عليه هجوس = فلا يبغي النشده ولو جات من جاره
وجودي وجوده يا عرب موجة "المنكوس" = على واحدن عيني ليمّته سبّاره
قتلني قتله الله وجرّح حشاي بموس = ترا أن مت ياربعي فالاسباب من (....)

ابيات راررئعه وجميله

مع المه يوجد لديه حس فكاهه :)

شكرررا ياسعود ..

المشاركة الأصلية كتبت بواسطة الملكة (المشاركة 437632) توجدات حزينة..ورائعة.. صح لسان حمد بن قريان الخويطري والله يعطيك العافية..سعود الخويطري..

وجودي وجود اللي على أوّل مفز صباه=يتيمن وإخيه ملاحظن كـل ماجوبـه
وقف عند لمّة حادثن ما درا بأقصـاه=تفكّر وإلـى سيـارة إخيـه مقلوبـه
كشف منّه لحافه وصـوّت ولاحاكـاه=درا إنّه توفّا وإعتزا ثـم مـزع ثوبـه
وجودي وجوده والحشا فيه مـا كفّـاه=على واحدن شـدّو عربهـم وقفوبـه