مجالس العجمان الرسمي - محاورة بين تركي2000 وصاحب السمو الامير.......

.
.
.
.
.
.
.
.
.
.
.
.
.

السلام عليكم

حبيت انقل لكم محاورة بين (شاعر الوطن) تركي الميزاني وصاحب السمو الامير خالد بن سعود الكبيـر

تركي

سلام الله سلام (ن) للعلـوم الطيبـه عنـوان
واعرف معزبه والظيف في حكمة معازيبـه
وانا لي صاحب (ن)ماينطق الكلمه بلا برهان
ابا اسولف معه والعلم يدريبه وانـا ادريبـه

الأمير خالد

الا يامرحبا واهلا بقلطة شاعر المطران
تراحيب (ن)لها بالصدر تشريقه وتغريبه
وانا ياصاحبي ماني بمثلك لشعر ميزان
ترفقبي ترى توي غشيم وداخلي ريبـه

تركي

يدوم لك البقا والطير مايكفخ بـلا جنحـان
وانا خابرك صقر وكل صقر(ن)له مخاليبه
سبحنا في البحور الي تضم اللولو والمرجان
واخذنا مانبي والوقت ماتصفـى مشاريبـه

الأمير خالد

صحيح الوقت مايصفى وتعكير الزمان الوان
واشوف الخايبه تعجب وهذي والله مصيبـه
غدى عند الهزيله شان والجزله ثمنهـا هـان
وسف الكذب والتهريج اشوف الناس تغزي به

تركي

اشوف اللي تشوفه طال عمرك يالله الغفران
واشوف الناس قامت تبتسم بسنون تركيبـه
لو ان اللي بنى البيت المسمى ثبت العمـدان
ماشفنا الريح تلعب بين ذرياتـه واطانيبـه

الأمير خالد

يا كيف الحل والحاله سفينـه مالهـا ربـان
يمشيها الهوى من حيـث ماهبـت دواليبـه
عربها ترقص وتزف على حس الوتر و الدان
يحسبون المعاني صولها من جاب لـه خيبـه

تركي

اظن الحل نتركهـا تهيـم بغبـة النسيـان
عسها من نصيب القيض لا هبت ملاهيبـه
لو ان النابغة مخطي ماعود بالرضى حسان
ويكفينا رضى حسان والوقـت وتجاريبـه

الأمير خالد

انا خابرك ميزاني وربعـك كلهـم شجعـان
علامك عرَ ض لـك هدفهـا ماتضحـى بـه
ترى صمتك عن الغاوي وتصديدك عن الخوان
عذاب(ن)للضمير الحي ولا في هرجتك غيبـه

تركي

انا مثلت فيك القاف مامثلت فيـه فـلان
وطبعي كل مقفي ملحقه واشذب عراقيبه
نبي نبعد عن المنقود والمشروه مهما كان
ولا نفرح على المسلم اذا كثرة عذاريبـه

الأمير خالد

اجل بنشدك عن فيل(ن)يحب مغازل النسوان
تضيق ابه الاماكن والمداخل مـن لغابيبـه
يقول إلهن انا الساحر وانا الباهر وانا الفنان
وهو ياكل شنق غيره وكل (ن)داري بعيبه

تركي

سمعت انه على كبره يحس بعقدة النقصان
مجند له رعـاة تمدحـه وتقـول ياطيبـه
لكن الفيل يبقى فيل يوم أن الحصان احصان
وضلع طويق ماكل(ن)يبي المرقى يعدي به

الأمير خالد

مابين ممسح الريضان وبين ملهي الرعيـان
غدى ما للجزاله دور ولا لاهل السنع هيبـه
الا يال الزمان الشين الا يال ضيعة الوجدان
نزل في سوق ابن قاسم وكل(ن)قال كم هي به

تركي

من اول كنت يا هداج تيما تروي الضميـان
لكن اليوم جمـك مانذوقـه مـن غثاريبـه
لابد الوقت يكشف من هو الرابح من الخسران
وكل(ن)يلتبس له ثوب في قده يصلـي بـه

الأمير خالد

انا يعجبني الشاعر قوي الحبك والبنيان
إلى منه بنى بيته يشوقك فن تقطيبـه
اجاذبه العلوم اللي تونس والخفا مابان
مثل تركي عساه يفوز بالمليون ويجيبه

منقول من جريدة الرياضيه
عدد 7097 تاريخ 6-3-2007