بأسم المغيث القادر الوهاب رب العالمين = اللي بيدينه فتحت أبواب السما وإقفالها
سبحانه اللي غاثنا وأغاث كل المسلمين =إعباده اللي تحتري عطفه على حلالها
المومنين الخاشعين الراكعين الساجدين = اللي لو يحوش المطر عنها ماهوب اشوالها
يالله بنبتِ لا ظهر شوفه يسر الناظرين = يذكر جنوب المملكه ويشاف في شمالها
ونوصّــف أرض المملكه مثل أرض زين العابدين = بالنبت والا بالطهارها أرضنا بلحالها
الين نسمع بالحيا مثل علوم الطيبين = اللي تنومسنا بطيب اخلاقها وافعالها
والله يعز المملكه وايعز ذربين اليمين = ستر البلاد وعزها واحماتها واظلالها
يعيش ابو متعب إمامِ للملوك العادلين = اللي حلفنا بالوفا والصدق والولاء لها
ويعيش سلطان الكرم والجود عون المعسرين = اللي عدود الجود لشعوبه يمد حبالها
والله يطوّل عمر من يحي تراث الاولين = اللي عطا البل حقها وأثنى على وبــّــالها
مشعل من كفوفه توصّف مثل وصف الرافدين = اللي يبل كبود خلق الله ويشرح بالها
ومن هاجسِ يطرب على شوفة وجيه الحاضرين = يامرحبا ترحيبةِ غنت لها وغنّالها
ويامرحبا ترحيبةِ تقلط على سمن وسمين =ترحيبةِ فعل المراجل مايجوز الا لها
هذا وأنا من لابةِ هل موقف وفعل مبين =لا شوّشة عقّالها عقّالها جهّالها
يايام بين العيد والعيد الكبير معيدين = شوفة بني عمِ على الدنيا قويِ جالها
ياعصابة الراس وحزام الظهر والحصن الحصين = يا اهل علومِ فخرنا فيها وفي مثالها
هل سربةِ لا حوّلة تقضي ديون العايلين = سحابةِ يسبق رعدها برقها واخيالها
اليا اجتمعنا جمعنا يرسي وحنا صاملين = يفنى عرب .. بس المطيّه مايفك إعقالها
يازين شوف جموعنا تدحم جموع المبغضين = في حزةِ رجليــّــها يفعل مثل خيــّــالها
هذا وحنا هل كرم وانلوذ من دون الزين = لكن حنّا قوم نبطش لا شرب فنجالها
قومِ ليا وردو يقال القوم ذولا ميتين = تقلط على ساحة وغى كن الوغى مدهالها
ياذخرنا هاللحين والا يوم عاد الوقت شين = اقولها يوم إن ابن حثلين قبلي قالها
والله يبيض وجه من يجمع وجيه الغانمين = في حفل تصنيف الغوالي دقها واجلالها
البل عطايا الله ونهواها على طول السنين = خصِ ليا صارت سناد وظافيات اسبالها
وجردا إرقبه متفهقِ سنامها والخشم زين = وسيعة النحر .. ندوّه والطرب زرفالها
لا روّحو بدو الجزيره كلبيهم حايلين = تقود ذود البدو واتشوّش على هوبالها
يازين دوّاجِ بها والمسلمين مربعين = تسوى صناديق الذهب في سويسرا واموالها
موقف شرف لوجيه يام افوز به دنيا ودين = يستاهلون اطلوح الغتره واذب عقالها
عند الكرام سلالة الشيخان والضلع المتين =اللي يفوح الطيب والناموس وسط دلالها
اعوال ابن حثلين طلقين اليمان النادرين = شيبانها خطت دروب المرجله لعوالها
يامرحبا ترحيبةِ الغالين عند الصادقين = يامرحبا ترحيبةَِ مثل القمر يرقالها
عن ربعي العجمان ارددها واعم السامعين = ترحيبةِ تذكر جديد علومنا واسمالها
هذا وصلى الله على محمد ختام المرسلين = اعداد ما لاحت بروقِ في نحور خيالها